Доҕоруом, ыйдаҥа киэһэҕэ
Эргиччи сулустар тыганнар,
Халлааҥҥа тырымныы, дьиримнии,
Уон араас өҥүнэн оонньуулар….

Сирдээҕи олохтон дуоһуйан,
Ааҕыахха сулустар хастарын,
Кэрэтиэн күлүмүн суһумар
Көрөрүм дьолломмут хараххын!

Уостубат тапталбыт суоһугар
Сүрэхтэр сипсиһэр тылларын,
Сыа хаарга толбонун түһэрэн,
Туолбут ый мичээрдии истэрэ…

***

Чаҕылхай даҕаны сулусчаан…

Чаҕылхай даҕаны сулусчаан
Одуулуу көрөр курдуккун,
Сирдээҕи олохпун тургутан,
Дьиктитик тырымныы тыгаҕын.

Тулабар күлүмнүү суһумнаан
Эгэлгэ өҥүнэн оонньообут,
Истиҥник тапталы туоһулаан,
Дьылҕабар бэлэҕин анаабыт,

Олохтон дуоһуйан олорон
Эйиэхэ, доҕоруом, махтаныам,
Бу курдук санаабын сааһылаан
Тапталым иэйиитин аныаҕым…

***

Тохсунньум олбоҕор олорсон…

Тохсунньум олбоҕор олорсон
Кыһыным кэрэтин туойабын,
Санаалыын сырдыкка талаһан
Иэйиибин эйиэхэ аныыбын.

Оргууйдук туолбут ый мичээрдиир,
Кыһыҥҥы ыйдары арыаллыыр,
Сулуспут чаҕылхай тырымар,
Дьылҕабыт бэлэҕин түстүүрэ….

Холумтан сылааһын олбохтоон,
Тохсунньум тымныыта арчылыыр,
Айылҕам кэрэтин көрдөрөн
Халлааҥҥа дьүкээбил суһумнуур…

Тулабыт сандааран сырдыгын!
Доҕоруом, кэрэттэн дуоһуйуох!
Сиэнчээммит үөрүүтүн үллэстиэх,
Олохпут дьолунан туолуохтун!

***

Варвара Парникова — Үүйэ. Өнөр