Тарскай илии баттааһыннаах грамоталар

Саха сиригэр физическэй култуура уонна успуорт сайдыытыгар сүҥкэн өҥөлөөх Николай Николаевич Тарскай төрөөбүтэ 100 сылын үөрүүлээхтик бэлиэтээһин үрдүк таһымнаахтык ыытылынна.

Кэрэ бэлиэ тэрээһиҥҥэ биһиги чулуу киһибит Николай Николаевич Тарскайы саха спордун аҕатынан билинэр, сүдү талааныгар, ыыппыт үлэтигэр сүгүрүйэр, үтүө аатын кэриэстиир, этэргэ дылы кини көҕүлээһинин, тэрийиитин ылынар дьон бу кэрэ бэлиэ түгэҥҥэ көхтөөхтүк кыттыбыттарын бэлиэтиир тоҕоостоох.

Үбүлүөйдээх тэрээһиннэргэ кыттыбыттар, Николай Николаевич хайдах курдук тэрийэр талааннааҕын, биир санаалаахтарын мунньан улахан хамсааһыны оҥорбутун сөҕөн-махтайан, чахчы даҕаны бэйэтин кэмигэр физическэй култуура, успуорт сайдыытыгар элбэх саҥаны, сонуну киллэрбит салайааччы буоларын бары киэн туттан туран эттилэр.

Аатырбыт ырыаһыт, биллиилээх мелодист, үрдүк көрдөрүүлэрдээх спортсмен, тыа сирин спордун салайааччытынан ситиһиилээхтик үлэлии сылдьыбыт сахалар улаханнык ытыктыыр киһибит, Саха Өрөспүүбүлүкэтин успуорт эйгэтигэр Д.П. Коркин аатынан Судаарыстыбаннай бириэмийэтин лауреата Аркадий Михайлович Алексеев бу бэлиэ күҥҥэ, Н.Н. Тарскайтан ылбыт наҕараадаларын – грамоталарын, дипломнарын уонна сэдэх хаартыскаларын аҕалан көрдөрөн, кэпсээн, мустубут дьон сэҥээриилэрин ылла.

Итинник, Н.Н. Тарскай төрөөбүтэ 100 сылын дьаһаллара киин куоракка сүрдээх көхтөөхтүк, элбэх киһи кыттыылаах тэрээһиннээхтик ыытылыннылар. Бу, Саха сирин чулуу киһитигэр сүгүрүйүү, кини аатыгар ытыктабыллаахтык сыһыаннаһыы уонна кэриэстэбил быһыытынан сыаналанар.

***
Петр ПАВЛОВ.
Ааптар хаартыскаҕа түһэриилэрэ.