Түүлээххэ даҕаны виноград үүнэр эбит

– Сибэкким аҕыйах, сүрүннээн цинния,махровай петуния, гладиолус, миравилис, хатаастан үүнэр тунбергия, львиный зев, шток роза диэн бааллар, олус сиэдэрэй атын сибэкки суох. Саҥа аҕыйах ук малиналаахпыт, былырыҥҥыттан кыралаан астанар. Икки черемухалаахпын, быйыл сибэккилэммиттэрэ, бытархай астаммыттара. Үс ук «хара кыталыгым» син баһаамын биэрдэ. Акация, вишня бааллар, эмиэ кыралар, оттон быкпаттар. Жимолость диэн баар, астанар, ону дьэ чаччыгыныардар көрүлэтэллэр. Аҕыйах ук уохта баар. Отучча хаппыысталаахпын уонна 35 ук арбузтаахпын, арбуһу төрдүс сыл үүннэрэбин.

– Оттон винограды хаһыс сылгын үүннэрэҕин, олортуҥ да астаммата буолуо дии?

– Уолум Володя 2022 сыллаахха саас саженец аҕалбыта. Онтон ыла саас теплицаҕа таһаарабын, сайылыыр. Күһүн хостоон, силиһин, умнаһын кырыйан баран иһиккэ уган, биэдэрэҕэ, умуһахха кыстатабын. Быйыл саас таһаарбытым кэннэ сэбирдэхтэниитэ астаах лабаалар тахсыбыттара. Өссө тахсыа эбит да, кыра түннүк буолан, сорох астаах лабаалара хаппыта быһыылааҕа. Ыам ыйыттан теплицаҕа олордобун. Аһа бытааннык тахсар. Кишмиш диэн суорт. Сырдык кыра астаах.

– Төһө көрүүлээх эбитий?

– Бастаан билбэт буоллаҕым дии. Мээнэ ити курдук таһаара-таһаара көрбүтүм, быйыл ас тахсыбытын көрөн дьэ болҕомтобун уурдум. Сибэкки Дуунньаны кытта сибээстэһэбин ээ. Бу саас үс саженец ылбытым. Виноград киэнин үс араас суорду. Онтукайдарбын аҕаламмын эмиэ итиннэ олоппутум. Ити астаах тэпилиисэбэр.

Бастакы икки сыл силиһин сайыннарар эбит, онтон үһүс сылыттан буора элбэх, сырдыга тиийэр буоллаҕына, астанар эбит.

Күнү наһаа таптыыр. Уутун сэбирдэҕэр уонна угар эмиэ кутаҕын. Аны кыратык тыалы сөбүлүүр эбит, онон саас дьиэбэр тыал оҥорон хордуоҥканан далбаатыыр этим, тыаллаах буоллаҕына, астаах сибэккилэрэ түспэттэр эбит.

Бэйэ-бэйэлэриттэн тэйиччи олордуллуохтаах, сырдыктарын, күүстэрин былдьаспат гына. Кыһын кыстыырыгар улахан иһиккэ угуллар эбит. Түөрт винограды хайдах батарарым буоллар (күлэр).

Сиэннэр баар буоланнар, винограды сиэтилэр аҕай. Онон көрүүлээх аҕай эбит. Быйыл өссө кукуруза диэни олортум, астанна. Бу манна дьэ уу бөҕө наада.

Биһиэхэ, Түүлээххэ даҕаны, көрүүтүн сатаатахха, виноград үүнэр эбит. Манна даҕатан эттэххэ, былырыын күһүн Зинаида Кириковналаах арбузтарын сиэбэтэх киһи диэн суох буолуо. Бэл мин тиксибитим.

***
Туяра Ушницкая, уопсас. кэрэсп. Түүлээх нэһилиэгэ