Суолга сэрэхтээх буолууга хамыыһыйа кэтээн көрүү үлэтин ыытта

Саҥа үөрэх дьылыгар бэлэмнэнии күргүөмнээхтик салҕанар. Ол курдук хамыыһыйа бэрэссэдээтэлэ Сунтаар улууһун баһылыгын бастакы солбуйааччыта Н.П. Александров,  Сунтаар нэһилиэгин баһылыгын солбуйааччыта В.С. Макаров, ГИБДД салайааччыта С.Ю. Федоров, үөрэх управлениетын начаалынньыга А.И. Иванов, Сунтаар улууһун суол хаһаайыстыбатын салайааччытын солбуйааччыта Д.С. Саввинов, оройуон дьаһалтатын бырамыысылынас отделын салайааччыта М.В. Иванов, общественнай Сэбиэт бэрэстэбиитэлэ Н.Г. Львова буолан СӨ үрдүнэн ГИБДД салаатын уопсай учуоттааһыныгар суол быраабылатын тутуһуутун көрдүлэр.

Суолга сэрэхтээх буолууга оҕолору таһар автобустарга бары дөкүмүөннэри бэрэбиэркэ ыытан, ону таһынан суоппар оҕолору таһар лицензиялаах буолуохтааҕын туоһуластылар. Улууска уопсайа оҕолору таһар 10 газель массыына уонна 5 автобус учуокка турара бэлиэтэнэр.

Уулуссалары кэтээн көрүү үлэтэ ыытылынна, манна ирдэбилгэ эппиэттэспэт суол бэлиэлэрин саҥардан туруорууга испиэһэк оҥордулар, ону таһынан дьон тоҕуоруһар сиригэр эбии суол бэлиэлэрин, ограждение уурар сирдэри анаатылар. Суолга куттал суоһаабат буолуутугар, өрүс үрдүгэр турар сорох уулуссалар массыына ааһарыгар табыгаһа суохтарын бэлиэҕэ ыллылар.

***

«Сунтаар улууһа (оройуона)» муниципальнай оройуон дьаһалтатын пресс-сулууспата