Сунтаарга үөрэҕириини сайыннарарга көдьүүстээх үлэ барар

Бу күһүн Сунтаар улууһун бары оскуолаларын дириэктэрдэрэ, үөрэх управлениетын үлэһиттэрэ начаалынньык А.И.Иванов салайааччылаах дойду тэбэр сүрэҕэр Москубаҕа тиийэн 1 нэдиэлэлээх кууруска үөрэннилэр. Киин куорат саамай үрдүк рейтиннээх 3 оскуолатыгар, «Сколково» Россия инновационнай киинин технопаркатыгар сылдьан билиилэрин-көрүүлэрин хаҥаттылар, бэйэлэрин үлэлэрин кытта тэҥнээн, туох саҥаны киллэриэххэ сөбүн ырыҥалаан, түмүк оҥостон кэллилэр.

Саха Өрөспүүбүлүкэтин үөрэҕириитин үтүөлээх үлэһитэ, Күндэйэ оскуолатын салайааччыта Иванова Маргарита Николаевна: 

— Улууспут баһылыга Анатолий Григорьев үөрэхтээһиҥҥэ улахан болҕомтону ууран, инники өттүгэр ыччат үрдүк ситиһиилэнэригэр бүк эрэнэн, өрөспүүбүлүкэҕэ инники күөҥҥэ тахсарга олук буолуо диэн, бу ураты улахан бырайыагы олоххо киллэрбитэ дьоһуннаах түмүктээх буолуо диэн саныыбыт. Ол курдук саас математика, нуучча тылын учууталлара Хабаровскай куоракка, наукаҕа бастакы хардыыларын оҥорор бастыҥ бырайыактаах оҕолор Москуба «Сколково» технопаркатыгар сылдьан үөрэнэн, дьарыктанан кэлбиттэрэ. Кэлэр өттүгэр эмиэ атын хайысханан педагогтар, учууталлар куурустарга бараллара былааннанар.
Дириэктэрдэр куурустара быһаччы ФГБНУ «Россия үөрэхтээһинин академиятын үөрэҕи салайыы управлениетын институтун» кытта быһаччы дуогабарынан ыытылынна. Биһиги үөрүүбүтүгэр уонна киэн туттуубутугар бу улахан институт дириэктэринэн саха уола Сергей Сергеевич Неустроев 2014 сылтан ананан улэлиир эбит. Ийэтинэн Сунтаар Элгээйититтэн, аҕатынан Уус Алдантан төрүттээх.
Куурус сүрүн тиэмэтинэн «От законов развития систем к проектному управлению: Проектное управление как инструмент развития социальных систем: базовые основания, проблемные зоны, механизмы повышения эффективности» буолла. Саха сиригэр, ол иһигэр Сунтаар улууһун улаханнык таарыйар оҕо доруобуйата, тыла сайдыбатах оҕо коммуникативнай туруга, сокуоннай саастарын ситэ илик оҕолор бэрээдэги кэһиилэрэ, оскуолаларга каадырдары тохтотуу о.д.а атын тиэмэлэргэ улахан кэпсэтии, ырытыһыы, бырайыак оҥоруутугар практическай үлэлэр бардылар, — диэн кэпсиир Маргарита Николаевна.

   
— Москва куорат оскуолаларын сайдыыта таһыччыта биллэр. Сүрүннээн сылдьыбыт оскуолаларбыт материальнай-техническэй база өттүнэн, саҥаттан-саҥа информационнай технологиянан хааччыллыылара, научнай үлэҕэ оҕону Россия саамай улахан үрдүк үөрэҕин кыһаларын кытта ыкса сибээстэһэн үлэлииллэрэ, Московскай электроннай оскуола (МЭШ) ситимнээхтик үлэлиирэ, ханнык баҕарар оҕо сылдьарыгар инновационнай информационнай полигоннары арыйыылара биһигини сөхтөрдө, саҥа санаалары уһугуннарда.
Биир уһулуччу түгэнинэн салайааччыларбыт сенатор А.К.Акимов, улууспут баһылыга А.В.Григорьев, үөрэх управлениетын начаалынньыга А.И.Иванов Н.М.Губкин аатынан РГУНГ салалтатын кытта көрсүһэн, оскуоланы бутэрээччилэргэ үрдүк үөрэх иннинээҕи бэлэмнэнии курсун ыытыыга Сунтаар улууһа сөбүлэһии түһэрсибиттэрин бэлиэтээн этэбит.
Бу сырыы төрөөбүт Сахабыт сирин судаарыстыбаннаһын күнүгэр сөп түбэспитэ эмиэ биир биһирэмнээх бэлиэнэн буолар. Саха Сирин бастайааннай бэрэстэбиитэлистибэтин дьиэтигэр сенатор А.К.Акимов анал ыҥырыытынан Москуба үрдүк үөрэҕин кыһаларыгар үөрэнэ сылдьар Сунтаартан төрүттээх устудьуоннары кытта истиҥ-иһирэх көрсүһүү буолла, ахтылҕаннаах дьонноруттан кыра кэһии тутан үөрүүлэрэ кэмэ суох.
Ити курдук олус үчүгэй, туһалаах сырыы саҥа санааны, үгүс идеяны киллэрбитигэр саарбахтаабаппыт. Салайааччыларбытыгар А.В.Григорьевка, А.И.Ивановка, үөрэхпит былаанын, суолбутун-ииспитин, олорор сирбитин барытын ымпыктаан-чымпыктаан оҥорбут Е.Д.Васильеваҕа барҕа махталбытын тиэрдэбит. Улууспут үөрэҕириитин сайдыытыгар үрдүк ситиһиилэр, килбиэннээх кирбиилэр арыллан истиннэр! — диэн бэлиэтиир Күндэйэ оскуолатын салайааччыта Маргарита Иванова.

***

Источник: «Сунтаар сонуннара»