Сунтаарга улуус дьаһалтатын сыллаҕы отчуота түмүктэннэ

Ахсынньы 18-20 күннэригэр, улуус баһылыга Анатолий Григорьев салайааччылаах отчуоттуур бөлөх Хочо эҥээртэн Дьаархаҥҥа, Маар-Күөлгэ уонна Уһун-Күөлгэ, Түбэй-Дьаархан, Түбэй уонна Сиэйэ нэһилиэктэринэн, отчуот түмүк күнүгэр Сунтаарга үлэлээтэ.  Олохтоохтор улуус дьаһалтатын сыллааҕы үлэтин отчуотун истэн баран бэйэлэрин боппуруостарын уонна этиилэрин киллэрдилэр.

Аҕа баһылык отчуотугар социальнай-экономическай сайдыы бары эйгэтин таарыйан сыл устата туох үлэ ыытыллыбытын сырдатта. 

Нэһилиэктэр олохтоохторо улуус дьаһалтатын сыллааҕы үлэтин отчуотун истэн баран бэйэлэрин боппуруостарын уонна этиилэрин киллэрдилэр. Сүрүннээн доруобуйа харыстабылыгар, үөрэҕириигэ, тыа хаһаайыстыбатыгар, ону таһынан хаһан да буоларын курдук, ордук элбэх боппуруос олох-дьаһах коммунальнай хаһаайыстыбатын эйгэтигэр туһаайылынна. Ону сэргэ уот кыамтатын күүһүрдүү, оптоволоконнай сибээс линиятын тардыллар болдьоҕун туоһуластылар, төлөөн үөрэнэр устудьуоннарга көмө көрүллүүтэ, оскуолаларга уонна детсадтарга туох уларыйыылар киирбиттэрин, элбэх оҕолоох ыалга дьиэ туттарга субсидия уонна тыа хаһаайыстыбатынан дьарыктанар ыалга туох көмө көрүллэрин чопчуластылар. Араас хайысхаларга анал исписсэлиистэр тийбэттэрин, күрэхтэһэ барар спортсменнарга бырайыстарыгар көмө көрүүтүн, кулууп дьиэтин өрөмүөннээһин уонна муниципальнай суолу оҥоруу о.д.а. сытыы боппуруостары көтөхтүлэр.

Тыа хаһаайыстыбатынан хайысхатыгар ордук чааһынай ыалга субсидия көрөөһүн, сиэмэлээһин, күрүөлээһин, үүт харчытын уонна сүөһү ахсаанын элбэтэргэ былааннаммыт үлэлэри чопчулаатылар.

Тутуу салаатыгар саҥа эбийиэктэри тутуу ону сэргэ өрөмүөн үлэлэрин былаанын туоһуластылар. Уот кыамтатын күүһүрдүү, оптоволоконнай сибээс, эдэр исписсэлиистэргэ уонна элбэх оҕолоох ыалга дьиэ туттарга субсидия көрүллүүтүн уонна Бүлүү өрүспүт туругун туоһуластылар. Доруобуйа харыстабылыгар босхо ылар эмптэри туһанарга төһө үп көрүллэрин уонна графигын чуолкайдастылар, нэһилиэктэртэн киирбит дьоҥҥо  тустаах (уопуттаах) быраастары  аныахха диэн этиилэри көтөхтүлэр.

Ону таһынан С.А. Зверев – Кыыл Уола 120 сыллаах  үбүлүөйүнэй тэрээһини ыытарга этиилэрин, бэйэлэрин туруорсууларын киллэрдилэр. 

Оптимизация боппуруоһугар Сунтаардааҕы туберкулезнай диспансер тэрилтэ инники дьылҕатын, социальнай хайысхаларга фонда тэрийэн эмптэнэ барар дьоҥҥо бүддьүөттэн эбии үп көрүү, тутуулары ыытарга аукцион нөҥүө ылсыбыт тэрилтэлэртэн үчүгэй хаачыстыбаны ирдээһин, Кыайыы 75 сылын көрсөргө тэрилтэлэр төһө үп көмө оҥороллорун туоһуластылар уонна ону таһынан дьоҥҥо-сэргэҕэ сынньалаҥ площадка бырайыагын оҥорон олоххо киллэриэххэ сөптөөҕүн эттилэр.

Отчуоттуур бөлөх бэрэстэбиитэллэрэ ыйытыктарга барыларыгар тустаах хоруй биэрдилэр, сорохторго  туһааннаах тэрилтэлэр салайааччылары кытта тус көрсөн, кыһалҕаларын чопчулаан, туруорсууларын суругунан киллэрэллэригэр сүбэлээтилэр. 

Нэһилиэктэр олохтоохторо улуус Аҕа баһылыгар уонна дьаһалта хамаандатыгар махтанан туран ыыта олорор үлэлэрин биһирииллэрин биллэрдилэр.

Түмүккэ Анатолий Васильевич нэһилиэнньэҕэ биһирэбиллэрин иһин махтанан туран, бу үүммүт сылга Сунтаар улууһа сайдарын туһугар өссө күүскэ сомоҕолоһон үлэлииргэ ыҥырда.

Эдэр дьон, саҥа специалистар тыаҕа олохсуйалларыгар анаан сөптөөх усулуобуйалары тэрийэргэ үлэ ыытыллар, ол курдук быйыл 35-гэр диэри саастаах 21 эдэр ыалларга дьиэ тутталларыгар субсидия көрүлүннэ. Бүгүҥҥү үөрүүлээх күҥҥэ улуус Аҕа баһылыга Анатолий Григорьев Сунтаар нэһилиэгин 4 ыалыгар саҥа дьиэ туттарга туоһу суруктары туттарда.

***

«Сунтаар улууһа (оройуона)» муниципальнай оройуон дьаһалтатын пресс-сулууспата.