Сунтаарга сэрии кэмин сырдатар виртуальнай түмэл үлэлээтэ

Сунтаар улууһугар олунньу ыйы оскуола оҕолоро бэрт сэргэхтик саҕалаатылар. Кинилэргэ анаан олунньу 2-6 күннэригэр С.А.Зверев аатынан норуот айымньытын киинин аактабай саалатыгар “Сунтаар оройуона Аҕа дойду Улуу сэриитин сылларыгар” диэн ааттаах мультимедийнай мусуой үлэлээтэ.

Виртуальнай түмэли Н.М.Родионова аатынан Сунтаардааҕы оҕо дьоҕурун сайыннарар киин (дириэктэр Ангелина Владимировна Атонова) тэрийдэ. Тэрээһин туһунан оҕо дьоҕурун сайыннарар киин дириэктэрин иитэр үлэҕэ солбуйааччы Айна Павловна Яковлева билиһиннэрдэ:

– Санатан этэр буоллахха, бу мусуой “Наследники Победы” улахан бырайыак иһинэн 2020 сыл түмүгүнэн улуус баһылыгын 50 тыһ. солк. сэртипикээтинэн наҕараадаламмыта. Мультимедийнай музейга Сунтаар нэһилиэгин үөрэнээччилэрэ, учууталлара, төрөппүттэрэ ирдэниллэр миэрэлэри тутуһан, кыралыы бөлөҕүнэн сырыттылар.

Биэс күн иһигэр барыта 492 көрөөччү сүрүн экскурсовод Галина Николаевна Лидочен уонна экскурсоводтар Н.В. Потапова, А.П. Яковлева, техниктэр Е.Б.Мурзабаев, В.В. Иванова, В.С.Зоммер, Е.А.Томская, Л.А.Колодезникова интэриэһинэй кэпсээннэрин сэргии иһиттилэр, кэрэхсии көрдүлэр. Түмүккэ көрөөччүлэр анкета толордулар, сэрии кыттыылааҕа эһэлэрин, хос эһэлэрин, аймахтарын аатын өйдөбүнньүк, баҕа санаа Аал Луук маһыгар суруйан ииллилэр.

Онон кэнчээри ыччаппыт Кыайыыны уһансыбыттары умнубакка өйдүү-саныы, холобур оҥосто сылдьыаҕар эрэнэбит.

***

Источник: «Сунтаар сонуннара»