Сунтаарга күн күбэй ийэлэри чиэстээтилэр

Улууска ийэ күнүгэр анаммыт ый чэрчитинэн уонна Арассыыйатааҕы Ийэлэр күннэрин көрсө сэтинньи 26 күнүгэр, улуус дьаһалтатын аактабай саалыгар күн күбэй ийэлэри чиэстээтилэр.

Улахан суолталаах уонна долгутуулаах тэрээһиҥҥэ ийэлэри ылбаҕай ырыаннан, тойугунан эҕэрдэлээтилэр, улуус Аҕа баһылыга Анатолий Григорьев бүтүн Арассыыйатааҕы «Матери России» уопсастыбаннай хамсааһын Сунтаардааҕы салаатын бэрэссэдээтэлин солбуйааччытыгар, Сиэйэ орто оскуолатын кылаабынай бухгалтерыгар Евдокия Максимоваҕа уонна Сунтаардааҕы коррекционнай оскуола-интернат тутаах үлэһитигэр Оксана Егороваҕа үтүө санааҕыт, истиҥ сыһыаҥҥыт, айылҕаттан бэриллибит муудараскыт, ийэ быһыытынан киэн-холку майгыгыт улуус кэнчээри ыччатын уонна олоҕун-дьаһаҕын сайдыытын олугунан буола турдун диэн эҕэрдэлээн, махтал суруктары туттарда.

Сунтаарбыт улууһугар күндү күн күбэй ийэлэрбитигэр анаммыт ый араас хабааннаах үтүө тэрээһиннэринэн тэриллэн бэрт сэргэхтик ааста.

Ону таhынан, Анатолий Григорьев уонна баһылыгы социальнай уонна имиджевай политикаҕа солбуйааччы Гаврил Еремеев куйаар ситимин нөҥүө сибээскэ тахсан улууспут дьоруой ийэлэригэр, Хордогой нэһилиэгиттэн 12 оҕолоох дьоруой ийэ Евдокия Егорованы, Кэмпэндээйи нэһилиэгиттэн тыыл бэтэрээнэ, 5 оҕолоох Матрена Федорованы уонна Хадан нэһилиэгиттэн 10 оҕолоох дьоруой ийэ Пелагея Спированы Арассыыйатааҕы Ийэлэр күннэрин эҕэрдэлээн «Ытык Ийэ» ааттары иҥэрдилэр. Үөрүүлээх тэрээһиҥҥэ Ытык Ийэлэргэ бэлиэ суруктары уонна анал бэлэхтэри туттарылынна, ону таһынан истиҥ иһирэх кэпсэтии таҕыста.

***

«Сунтаар улууһа (оройуона)» муниципальнай оройуон дьаһалтатын пресс-сулууспата.