Сунтаарга өссө биир тупсаҕай көстүүлээх саҥа дьиэ үлэҕэ киириэҕэ

Улууска “Хаарбах дьиэттэн олохтоохтору көһөрүү” федеральнай программа үлэлээн саҕалыаҕыттан олус элбэх саҥа дьиэ тутуллан үлэҕэ киирдэ. Холобура, аҥардас  ааспыт сылга бу тосхолунан 5 дьиэ тутуллан саҕалаабыта.

Сунтаар киинин хабайар ортотугар дьэрэкээн көстүүлээх, халлааны талаһар 5 мэндиэмэннээх дьиэ тутуллан ыам ыйын 26 күнүгэр үөрүүлээх түгэҥҥэ арыллыаҕа. Эбийиэги “Главстройкомплекс” тутуу тэрилтэтэ дьэндэтэн таһаарда. 

Бу тэрилтэ салайааччыта Анатолий Исаев Сунтаартан төрүттээх уонна эппиэтинэстээх тутааччы буолан, эбийиэктэрин хаачыстыбата киппэ, көстүүтэ тупсаҕай.

Дьиэ иһигэр киирдэххэ сырдык, ыраас киэҥ-куоҥ кыбартыыралар ааннарын арыйаллар. Саамай улахана 89 кв. м. иэннээх. Бастакы этээскэ муостаны сылытар оборудование холбоммут. НВК ханаала көстөрүн курдук, барыта 20 ханааллаах кабель тардыллыбыт.

Бу курдук нэһилиэнньэ олоҕун хаачыстыбатын тупсарыыга анал программа үлэлээн тыа сирин сайдыытын кэскилэ кэҥиир.

***
Сунтаар улууhун пресс сулууспата