Сунтаардар байыаннай дьайыы кыттыылаахтарыгар көмө оҥоро олороллор

Сунтаар улууһун бар дьоно, тэрилтэлэрэ, уопсастыбаннай түмсүүлэрэ, түөлбэлэрэ, үлэ кэлэктииптэрэ байыаннай сулууспалаахтарга, кинилэр дьиэ кэргэттэригэр көмө хайдах бара турарын туһунан улуус баһылыгын солбуйааччы Гаврил Еремеев кэпсээтэ.

— Байыаннай сулууспалаахтар дьиэ кэргэттэригэр көмөлөһүүгэ анал улуустааҕы штаб үлэлиир. «Ыччат политикатын отдела» МКУ баазатыгар буойуттар дьиэ кэргэттэригэр көмөлөһөр штаб, маны сэргэ хас биирдии нэһилиэккэ маннык штабтар тэриллэн үлэлии олороллор. Биллэрин курдук, хас биирдии дьиэ кэргэҥҥэ олох-дьаһах, кирэдьиит, оҕо саадын, социальнай өйөбүл араас боппуруостарын быһаарар кыһалҕалар бааллар. Улуус дьаһалтата кинилэргэ көмөлөһүүгэ социальнай өйөбүл кэккэ дьаһалларын ылыммыта.

Үп-харчы өттүнэн өйөбүл көрүллэн, улуустан төрүттээх байыаннай сулууспалаахтарбытыгар биир кэмнээх 50 тыһ. солкуобай туттарыллыбыта. Ону таһынан улуус уурааҕынан байыаннай сулууспалаахтар дьиэ кэргэттэригэр биирдии кэмнээх харчынан өйөбүл оҥоһуллубута. Ол быһыытынан быстах хомуурга ыҥырыллыбыт буойуттар чугас дьонноругар 15 тыһ. солкуобайдаах биир кэмнээх көмө харчы туттарыллыбыта.
Улуус дьаһалтата буойуттарга уопсайа 7 155 192 солкуобайга байыаннай таҥаһы, туттар малы-салы, эми-тому (тепловизордар, квадрокоптердар, эм-том, генератордар, портативнай аккумулятордар, флис мааскалар, рациялар уо.д.а.) хааччыйбыта.

Сунтаар улууһун социальнай-экэнэмиичэскэй сайдыытын пуондатыттан уопсайа 1 051 635,00 солкуобайдаах үбүнэн байыаннай эпэрээссийэҕэ сылдьар буойуттарга наадалаах автотранспорт, медицинскэй препараттар уо.д.а. ылыллан, биир дойдулаах буойуттарбытыгар ыытыллыбыта. Маны сэргэ 2 122 260,00 солкуобайдаах сууманан «Саха сирин ийэлэриттэн итии тапталынан» аахсыйанан тигиллэр таҥас матырыйаала, тепловизионнай уонна коллиматорнай прицеллар, монокулярдар, радиостанциялар, көмүскүүр хаххалар, шевроннар уо.д.а. атыылаһыллан, булуллан, байыаннай эпэрээссийэҕэ сылдьар уолаттарбытыгар тиксэриллибитэ.

Бүгүҥҥү туругунан 40 киһи судаарыстыбаннай эбэтэр муниципальнай бас билиигэ баар сир учаастагын түүлэһии уонна итиннэ иэс иһин төлөбүртэн босхоломмута. Билигин бары нэһилиэктэргэ маннык быһаарыылары ылынан толоро олороллор. Үөрэхтээһин эйгэтигэр улуус үөрэххэ управлениетын дааннайынан, буойун байыаннай сулууспаҕа сылдьар кэмигэр оҕо саадын төлөбүрүттэн 43 иитиллээччи төрөппүтэ босхолонно, 5-11 кылаастарга үөрэнэр 29 оҕо босхо аһылыгынан, 55 оҕо өрөспүүбүлүкэ иһигэр оҕо сайыҥҥы сынньанар лааҕырдарыгар босхо путевканан хааччылыннылар. Уопсастыбаннай тырааныспарга босхо айан, култуура тэрээһиннэригэр босхо сылдьыы, балыыһаҕа көрдөрүүгэ чэпчэтиилэр уо.д.а. курдук, өйөбүл, көмө араас көрүҥэ үлэлии тураллар.

Дьиэ кэргэттэргэ улуус үрдүнэн волонтердар, тимуровецтар көмөлөрө, психологтар, юристар, финансистар консультациялара, буойуттарга таҥаһы-сабы, көмүскүүр хаххалары уо.д.а. тигии, гуманитарнай өйөбүлү хомуйан ыытыы, араас аһымал аахсыйалар, буойуттары, кинилэр дьиэ кэргэттэрин кытта сибээһи тутуу, үөскүүр бары боппуруостары тутатына быһааран иһии утумнаахтык бара тураллар.

Бу үлэлэргэ нэһилиэнньэттэн саҕалаан уопсастыбаннай тэрилтэлэр, түмсүүлэр, түөлбэлэр, үлэ кэлэктииптэрэ бары кытта олороллоро биһирэбиллээх. Сунтаар сирэ, дьоно-сэргэтэ уолаттарын кыайыы аргыстаах этэҥҥэ эргиллэн кэлиилэрин кэтэһэллэр, ол туһугар ахсаабат көмөлөрүн оҥоро олороллор.

***

Источник: Саха сирэ