Сунтаар улууһун  даһалтата сыллааҕы үлэтин нэһилиэнньэ иннигэр отчуота саҕаланна

Ахсынньы 17 күнүттэн Сунтаар улууһун  даһалтатын 2019 сыллааҕы үлэтин нэһилиэнньэ иннигэр отчуота саҕаланна. 

Улуус Аҕа баһылыга Анатолий Григорьев салайааччылаах бастакы отчуоттуур бөлөх  Хоро, Элгээйи уонна Күндэйэ нэһилиэктэригэр сылдьан үлэлээтэ. Бастакы бөлөххө улуус баһылыгын кытары улуустааҕы үөрэх управлениетын начаалынньыга Альберт Иванов, тыа хаһаайыстыбатын управлениетын начаалынньыга Иван Тихонов, тутуу комплексын начаалынньыга Иван Егоров, экономическай сайдыы управлениетын начаалынньыга Ия Ефремова, култуура уонна духуобунай сайдыы управлениетын начаалынньыга Мария Кобьельянова, Сунтаар улууһугар нэһилиэнньэ дьарыктаах буолуутун киинин начаалынньыга Александр Николаев, Сунтаардааҕы РЭС тэрилтэ начаалынньыга Юрий Григорьев, улуустааҕы полиция  начаалынньыга Дмитрий Никифоров,  оройуон киин балыыһатын кылаабынай бырааһын солбуйааччыта Константин Павлов, Сунтаардааҕы экология инспектора Алексей Тойтонов, “ОДьКХ” ГУТ Сунтаардааҕы филиалын сүрүн инжиниэрэ Степан Егоров, нэһилиэнньэ социальнай харыстабылын управлениетын сүрүн исписсэлииһэ Вероника Иванова, баайга-дуолга уонна сиргэ сыhыаннаhыылар кэмитиэт сүрүн исписсэлииһэ Сардаана Ксенофонтова кыттыыны ыллылар.

Аҕа баһылык отчуотугар ааһан эрэр 2019 сылга улууспутугар Экология уонна доруобуйа сылыгар ыытыллыбыт сүрүн үлэлэри сырдатта. Нэһилиэктэр олохтоохторо улуус дьаһалтатын сыллааҕы үлэтин отчуотун истэн баран бэйэлэрин боппуруостарын туруордулар.

Ол курдук, куоракка олорон диализ өҥөтүн туһанар доруобуйатынан хаарчахтаах оҕоҕо төрөппүтэ туох көмө баарын туоһуласта, оскуолаларга уонна детсадтарга туох уларыйыылар баалларын, улуус киинигэр үлэлиир эдэр исписэлиистэргэ  олорор дьиэннэн хааччыйыы боппуруоһа, өрүс киртийээһинин ыраастыырга туох улэ ыытылларын туоһуластылар.

Үрдүк күүрүүлээх уот линиятын күүһүрдүүгэ уонна уот сыанатын чопчулуурга этиилэр киирдилэр. Элбэх боппуруос тыа хаһаайыстыбатыгар туһаайан ананна, онно үүт харчытын сыанатын үрдэтии,  үрүҥ илгэттэн бэйэ бородууксуйатын оҥорон таһаарыы уонна чааһынай ыалга саха ынаҕын иитэргэ, элбэтэргэ өйөөһүн баар буолуо дуо диэн этиилэр турдулар.

Доруобуйа харыстабылын өттүгэр, оҥоһуллар өҥө хаачыстыбатын үрдэтиигэ этиилэр уонна туруорсуулар киирдилэр. Оптоволоконнай сибээс линията киирэ илик нэһилиэктэригэр ООО «ЯКСТАР» тэрилтэ сайын ыһыахха диэри сибээс өҥөтүн тардарга ылсыбытын дьон-сэргэ үөрэ иһиттэ.

Нэһилиэнньэлэр олохтоохторо улууспут Аҕа баһылыгын уонна дьаһалта ыыта олорор бэлиитикэтин биһириибит диэн сыаналаатылар.

***

«Сунтаар улууһа (оройуона)» муниципальнай оройуон дьаһалтатын пресс-сулууспата