Сунтаар улууһун бары нэһилиэктэригэр суолунан сырыы олохтонно

Ахсынньы 18 күнүгэр, улуус кииниттэн саамай ыраах, хаайтарыылааҕынан аатырбыт нэһилиэк олохтоохторо араас көрсүһүүлэргэ сытыытык туруорсубут баҕа санаалара олоххо киирдэ, Хордогой-Кириэстээх муниципальнай суолун үөрүүлээх аһыллыыта буолла. 

Суол – олох төрдө, билиҥҥи сайдыылаах 21с үйэҕэ олоххо биир саамай улахан суолталаах тыын боппуруос буолар. Бу күнтэн улууспут дьоно-сэргэтэ кыра, араас омук массыыналарынан улуус киинигэр, киин куоракка сылы эргиччи айанныыр кыахтаннылар, онон биһиги улууспутугар биир умнуллубат бэлиэ түгэн тосхойдо. Суолу өрөмүөннээһинэ 93% СӨ Суол-иис министиэристибэтин дорожнай фондатын субсидиятынан үбүлэннэ, 7% улуус бүддьүөтүттэн көрүллүннэ.

Үөрүүлээх чааска айан суола өр сылларга эрэллээхтик сулууспалаатын, айанньыттар суолларын аартыга алгыстаах буоллун диэн сири-уоту аһатан СӨ култууратын туйгуна, Хордогой нэһииэгин бочуоттаах олохтооҕо Александр Кириллин алгыс тылларын анаата. Умнуллубат бу күҥҥэ улуус Аҕа баһылыга Анатолий Григорьев, Хордогой нэһилиэгин баһылыга Сергей Барамыгин, тутуу салаатыгар суол-иис хаһаайыстыбатын сүрүннүүр исписсэлииһэ Дмитрий Васильев уонна нэһилиэк олохтоохторо кыттыыны ыллылар. Нэһилиэк олохтоохторо өр сыллаах ыра санааларын олоххо киллэрэргэ көмөлөспүт дьоҥҥо махталларын биллэрэллэр.

***

«Сунтаар улууһа (оройуона)» муниципальнай оройуон дьаһалтатын пресс-сулууспата