СУНТААР УЛУУҺУГАР – ТЫА ХАҺААЙЫСТЫБАТЫН КҮННЭРЭ
Ол чэрчитинэн сэтинньи олоҥхо дьиэтигэр “ИДЭҺЭ-2019” тыа хаһаайыстыбатын бородууксуйатын атыы-эргиэн дьаарбаҥката тэрилиннэ. Манна араас нэһилиэктэртэн тыа хаһаайыстыбатынан дьарыктанар урбаанньыттар уонна кээпэрэтииптэр бэйэ оҥорон таһаарбыт бородууксуйаларын – сир аһыттан барыанньалары, үрүн илгэттэн сүөгэй, үүт, арыы эгэлгэтин уонна сылгы, ынах этин арааһа дьоҥҥо-сэргэҕэ хамаҕатык атыыланна.
Саха төрүт дьарыгын, ынах сүөһүнү өрө тутан олоҕун анала гыммыт Үлэ Албан аат уордьан толору кавалера, СӨ норуотун хаһаайыстыбатын үтүөлээх үлэһитэ «Хотугу Сулус» уордьан хаһаайына, Бордоҥ, Кириэстээх уонна Сунтаар нэһилиэгин Бочуоттаах олохтооҕо Владимир Африканович Михайлов олоҕун, үлэтин-хамнаһын сырдатар «Үлэттэн дьолун булбут герой» диэн саҥа кинигэ сүрэхтэннэ.
Бу кинигэни Арассыыйа суруналыыстарын Сойууһун чилиэнэ, СӨ тыатын хаһаайыстыбатын туйгуна Борис Потапов сурукка тиһэн, бэчээттээн таһаарда. Үөрүүлээх тэрээһиҥҥэ дьоруой ыанньыксыкка улууспут Аҕа баһылыга Анатолий Григорьев, тыа хаһаайыстыбатын управлениятын салайааччыта Иван Тихонов, Бордоҥ уонна Кириэстээх нэһилиэгин дьоно-сэргэтэ, чугас доҕотторо уруйдуу-айхаллыы түмүстүлэр.
Түмсүүлээх үлэ түмүгэ
Салҕыы, уостубат уйгуну-быйаҥы уһансар, төрүт дьарыкпытын өрө тутан сыһыы муҥунан сыспай сиэллээҕи, хороҕор муостааҕы тэнитэр тыа хаһаайыстыбатын туруу үлэһиттэрин идэлээх күннэрин культура киинигэр бэлиэтэннэ.
Улууска тыа хаһаайыстыбатынан дьарыктаныы инники күөҥҥэ турар биир сүрүн салаа буолар. Өбүгэлэрбит үйэлэриттэн илдьэ кэлбит төрүт астарын, үрүҥ илгэбитин астыыр уонна оҥорон таһааран батарыыга улахан сыал-сорук уурулунна. Быйылгы өрөспүүбүлүкэтээҕи сылын аайы ыытыллар Ас-үөл дьаарбаҥкатыгар кыттан кыайыы кынаттанан 20 сыл буолан баран «Гран-при» наҕараадатын, көһө сылдьар Кыһыл Знамя ылан үөрүүбүт үксээтэ. Бу барыта түмсүүлээх үлэ түмүгэ буолар.
Идэлэригэр бэриниилээх, салаа сайдыытыгар олохторун анаабыт, эдэр ыччакка холобур буолар, өр сылларга бу эйгэҕэ үлэлээбит чулуу дьоммутугар сүһүөхтээх бэйэбит сүгүрүйэн туран дириҥ махталбытын тиэрдэбит. Олоҥхо дойдута Сунтаарбыт туруу үлэһит дьонунан киэҥ туттабыт!
***
“Сунтаар улууhа (оройуона)” муниципальнай оройуон дьаһалтатын пресс – сулууспата
Не пропустите
Шиномонтаж Левша
Cтоматология 32
Оставить комментарий