Сунтаар улууһугар оробуочай сырыыннан “Якутскэнерго” делегацията кэллэ

Тохсунньу 29 күнүгэр, Сунтаар улууһугар оробуочай сырыыннан “Якутскэнерго” хампаанньа генеральнай дириэктэрэ Алексей Стручков салайааччылаах делегация кэллэ.

Улуус саламтата делегация кыттыылаахтарын кытта уот ситимигэр туһаайыллар боппуруостарга кэпсэттии ыытта. Улуус Аҕа баһылыга Анатолий Григорьев билигин улууспут дьонун-сэргэтин ахсаана 24 тыһ. ахсааҥҥа тэҥнэһэрин, онтон аҥардас Сунтаар нэһилиэгэр 12 тыһ. кэриҥэ дьон олорорун бэлиэтээн туран, уот кыамтата араас түөлбэлэринэн мөлтүүр түгэннээҕин иһитиннэрдэ. Ону аахсыбакка биһиги улуус өрөспүүбүлүкэҕэ олорор дьиэлэри уот ситимигэр холбонон сылытарга биир улахан туһанааччы буоларбыт быһыытынан, сыллата нэһилиэктэринэн подстанциялар уонна трансформатордар кыамталарын үрдэтээһин уонна саҥардааһын үлэтэ тиһигин быспакка ыытылларын бэлиэтээтэ.

Делегация кыттыылаахтара Бүлүү бөлөххө уот ситимин кыһалҕалаах боппуруостарын биир сүрүн хайысхатынан Сунтаар уонна Ньурба улуустарыгар үрдүк күүрүүлээх уот линиятын бырайыагын оҥорооһун үлэтэ бара турарын сырдаттылар. Бырайыак гос экспертизаны аастаҕына хампаанньа СӨ Бырабыытылыстыбатын кытта бу бырайыак үбүлээһинигэр ыкса сүбэлэһэн, эһиилгиттэн линия тутуута саҕаланарын иһитиннэрдилэр. Ону таһынан, улуус киинигэр былырыыҥҥаттан саҕаламмыт «Сунтар-3» подстанция тутуута түмүктэннэҕинэ быйыл үлэҕэ киирэн социальнай эбийиэктэргэ уонна нэһилиэнньэҕэ уот ситимин күүһэ бигэ буоларын эттилэр.

Дьыалабыай кэпсэтии кэннэ мунньах кыттыылаахтара миэстэтигэр тиийэн «Сунтар-3» подстанция тутулла турар сирин көрдүлэр-иһиттилэр.

***

“Сунтаар улууhа (оройуона)” муниципальнай оройуон дьаһалтатын пресс – сулууспата.