Сунтаар улууһун баһылыга Анатолий Григорьев салайааччылаах делегация Москуба куоракка тиийдэ

Үгэскэ кубулуйбут анал байыаннай дьайыы буола турар сиригэр айан саҕаланна. Улуус баһылыга Анатолий Григорьев салайааччылаах делегация Москваҕа тиийдэ. Кинилэр байыастары кытта көрсөн Аҕа дойдуну көмүскээччилэр күннэринэн эҕэрдэлиэхтэрэ, гуманитарнай көмөнү тириэрдэн биэриэхтэрэ.

Улуус дьоно-сэргэтэ 700 киилэ кэриҥэ ыйааһыннаах таһаҕаһы бэлэмнээтэ. Манна сылаас таҥас-сап, ас-үөл, эмп-том арааһыттан баар. 

Делегацияҕа Күүкэй, Аллыҥа, Уһун Күөл, Илимниир нэһилиэктэрин баһылыктара, ыччат отделын салайааччыта бааллар. Быйылгы сырыы уратыта диэн алгысчыттаах бардылар. 

Билигин хантыраак баттаһан сулууспалыы сылдьар биир дойдулаахпыт Юрий Гуринов көҕүлээһининэн саха балаҕана тутуллан эрэр. Ол тутуллуохтаах сиригэр-уотугар алгысчыт Николай Омуков сиэри-туому толорон алгыһы түһэриэҕэ.

Байыастар санааны ыраастанарга өйү-санааны сааһыланарга маннык итэҕэл дьиэтэ наадалааҕын өйдөөн сөпкө дьаһанан эрэллэр. Алгыстанар, арчыланар балаҕан дьиэтэ толору хааччыллыылаах буоларын курдук гуманитарнай көмөҕө ыраастыыр оту-маһы, онно аналлаах иһити, сахалыы тэриллэри илтилэр.

***
Сунтаар улууһун дьаһалтатын пресс-сулууспата