Сунтаар улууһун баһылыга Анатолий Григорьев салайааччылаах улуустааҕы коллегия мунньаҕа Тойбохойго ыытылынна

Тойбохой нэһилиэгэ улуус биир бастыҥ уонна улахан нэһилиэнньэлээх пууна буолар. Быйылгы үөрүүлээх сонуннартан үллэһиннэххэ аныгы ирдэбилгэ толору эппиэттиир баһаарынай чаас эбийиэгэ үлэҕэ киириэҕэ. Бу эбийиэги Хочо нэһилиэктэрэ бары кыттыһан, үбүлээн туттардылар. Маннык кыттыгаһынан тутуу ньымата республикаҕа бастакы. Оттон Сунтаар-Мииринэй хайысхатынан, Тойбохойго үлэлии турбут саппараапкалыыр станция сабыллан кыһалҕанан турбута ыраатта. Бу боппуруос быһаарыллан, предприниматель Сергей Яковлев атыылаһан ылла уонна салгыы үлэлэтиэҕэ диэн иһитиннэрдилэр.

Ханна да буоларын курдук, дьон-сэргэ үчүгэй, тупсаҕай усулуобуйаны ирдиир. Ол курдук, участковай балыыһа, 90 миэстэҕэ оҕо уһуйаана, спортивнай саала тутуутун туруорсаллар. Маныаха, бу хайысхаларга үлэ бара турар, анал программаларга киирсэн, нэһилиэнньэҕэ олус наадалаах социальнай эбийиэктэр инникитин олоххо киириэхтэрэ.

Социалистическай үлэ Дьоруойа, уһулуччулаах учуутал, оччолорго Тойбохой үөрэнээччилэрин кыраайы үөрэтиигэ, оту-маһы үүннэриигэ, айылҕаны таптыырга уһуйбут Георгий Бессонов төрөөбүтэ 110 сылыгар олус элбэх тэрээһин үлэ ыытыллара былааннанар. Манна анал хамыыһыйа тэриллэн үлэ барыаҕа.

Маны тэҥэ, төрөппүт көрүүтэ-истиитэ суох хаалбыт оҕолору дьиэлээн, иитэн-такайан таһаарар оҕо дьиэтэ үлэлээбитэ 85 сыла. Манна эмиэ тус былааннаах, туһаайыылаах үлэ күүтэр. 

Коллегия түмүгүнэн, манна көрүллүбүт хас биирдии боппуруоһу тустаах тэрилтэлэр, тэрилтэ салайааччылара ымпыгар-чымпыгар тиийэ үөрэтэн, кыһалҕаны туоратыыга үлэлиэхтэрэ диэн  Анатолий Григорьев эттэ, сорудаҕы туруорда. 

***
Сунтаар улууhун пресс-сулууспата