Сунтаар улуһугар индустриальнай паарканы тэрийиэхтэрэ

Сэтинньи 12 күнүгэр Сунтаар улууһугар индустриальнай парка тэриллээһинин боппуруоһугар улууспут Аҕа баһылыга Анатолий Григорьев салайыытынан Сунтаар улууһун олохтоохторун уонна Сунтаар, Устье, Кэмпэндээйи нэһилиэктэрин баһылыктара кыттыылаах аһаҕас иһитиннэрии буолан ааста.

Индустриальнай парка аныгы технологияннан оҥорон таһаарыы, кыра уонна орто урбаан, регион инновационнай сайдыытыгар төһүү күүс буолуоҕа. Бу олохтоох нэһилиэнньэни бэйэ оҥорон таһаарар производстватыгар үлэлэтии, ол аата прибавочнай стоимость оройуоҥҥа хаалар, дьон үбэ тас сиргэ тахсыбакка улуус иһигэр эргийэр, аныгы технологиянан туһаныы түмүгэр оҥорон таһаарар бородууксуйа, уопсайынан олох хаачыстыбата биллэ-көстө үрдүүрүгэр туһуланыа. Улахан промышленнай тэрилтэлэр аныгы отраслевой стандартартка сөп түбэһэр бородууксуйаны атыылаһыахтара, ол таһымҥа тахсарга күүскэ үлэлэһиигэ, бородуксуйаны кылгас болдьоххо үлэҕэ киллэрии уонна барыыска, дохуокка тахсыыга сыалланыахтара.

Индустриальнай пааркаҕа үс участок киириэҕэ, ол курдук: Сунтаар, Устье уонна Кэмпэндээйи нэһилиэктэригэр. Анаммыт участоктар транспортнай инфраструктуралаахтар. Индустриальнай паарканнан ааҕыллар резиденнар тутталларыгар аналлаах капитальнай тутуу объектар, инженернай инфраструктура, арааһынай хайысхалаах цехтар, лабораториялар, испытательнай полигоннар, складтар баар уопсай комплекстара тутуллуохтара.

Индустриальнай парка үлэҕэ киириитигэр элбэх үлэ миэстэтэ тахсыа, эдэр ыччаты араас идэлэргэ Сунтаарбыт технологическай колледжа бэлэмниэ, центральнай үөрэх кыһаларыгар үөрэнэр оҕолорбут дойдуларыгар кэлэн олохсуйуохтара.

Аһа5ас иһитиннэрии кэнниттэн индустриальнай парка тэриллиитин өйөөн мунньах кыттыылаахтара сүүс бырыһыан куоластаатылар, улууспут сайдыытын түстээтилэр.

***

«Сунтаар улууһа (оройуона)» муниципальнай оройуон дьаһалтатын пресс-сулууспата