Курс валют
$
64.35
0.09
71.05
0.2
Курс валют
Курс валют
$
64.35
0.09
71.05
0.2
Меню
Поиск по сайту

Балаҕан ыйыгар Сунтаар Күүкэйигэр 20 мөлүйүөннээх тутуу үлэҕэ киириэхтээх

24.08.2018 12:31 0
Балаҕан ыйыгар Сунтаар Күүкэйигэр 20 мөлүйүөннээх тутуу үлэҕэ киириэхтээх

Атырдьах ыйын 21-23 күннэригэр СӨ тыатын хаһаайыстыбатын миниистирин э.т. Александр Атласов Сунтаар улууһугар бара сырытта.

Александр Павлович Сунтаар улууһугар баһылык Анатолий Григорьевы, улуус баһылыгын солбуйааччы Борис Васильевы, тыа хаһаайыстыбатын управлениетын салайааччытын Иван Тихоновы кытары бастаан Күүкэй нэһилиэгэр тутулла турар шлюз-регуляторы, «Күүкэй» ПК үлэтин кытары билсистилэр.

Күүкэйдэр бу тутууну туруорсубуттара быданнаата. Уопсайа объект тутуутугар 20 мөл. солк. харчы көрүллубутэ. Бэдэрээччит — «Айан суол». Куораттан уонча  киһи кэлэн үлэлии сылдьар. Билигин бетону кутуу үлэтэ бара турар.  Сунтаар улууһун баһылыга Анатолий Григорьев этэринэн, тутуу алтынньы саҕаланыыта үлэҕэ киириэхтээх.

 

           Сырыы иккис күнүгэр «Кириэстээх» ТХПК Бордоҥ сайылыгар «Үлэ Албан аата» уордьаннар толору кавалердара, СӨ норуот хаһаайыстыбатын үтүөлээх үлэһитэ Владимир Михайловы кытта көрсөн, ирэ-хоро үлэ-хамнас туhунан аhаҕастык кэпсэттилэр.

Маныаха сайылык тутуутугар көмө наадатын уонна сайылыкка дылы суол тутуута киирэрэ буоллар диэн эттилэр. Аҥардас биир сайылыктарыгар диэри айан суола 8 км, манна бэйэлэрин күүстэринэн 3 км кутан оҥорбуттар эбит.
Салгыы хаһаайыстыба дириэктэрэ Владимир Егоров Куокуну Улахан Табаҕатыгар  хотоннору көрдөрдө. Күн бүгүн хаһаайыстыбаҕа  Алтайтан үүт, Калмыкияттан эт боруода уопсайа 1872 сүөһү баар, ол онтон ыанар ынаҕа — 880. Ортотунан биир ынахтан сылга 3474 кг уут ыан олороллор.

Барыта 102 үлэһиттээх. Орто хамнас 27 тыһыынча солк., онтон производствоҕа үлэлиир киһи хамнаһа 35-36 тыһыынчаҕа тэҥнэһэр. Сайын хамнас биллэ үрдүүр.
Урукку сылларга СХПК «Кириэстээх» федеральнай бюджеттан үүккэ субсидия ылар этэ, ол төһүү күүс буолара диэн бэлиэтиир хаһаайыстыба салайааччыта. Владимир Егоров этэринэн, 2012 с. салайааччынан ананыаҕыттан тэрилтэ суотугар 5 хотон туттуннулар, техникэни 100% саҥартылар. Маныаха хаhаайыстыба хотон тутуутугар субсидия ыла илик. Онон Кириэстээхтэр хотон тутуутун үбүлээһинин туруорсаллар.

 Куокуну нэһилиэгин Улахан Табаҕа сиригэр Александр Атласов, Арассыыйа Федерациятын Сэбиэтин чилиэнэ Александр Акимов, «Арктик-Капитал» ХЭТ генеральнай дириэктэрэ Андрей Николаев, улуус баһылыга Анатолий Григорьев, тыа хаһаайыстыбатын управлениетын начаалынньыга Иван Тихонов, үөрэх управлениетын начаалынньыгын солбуйааччы Альберт Иванов, нэһилиэк баһылыктара, оскуола дириэктэрдэрэ, тыа хаһаайыстыбатын исписсэлиистэрэ, бэтэрээннэрэ  Сунтаар улууһун тыатын хаһаайыстыбатын сайдыытын, кадровай бэлиитикэтин тула мунньахтаатылар.

Сылын аайы ыытыллар мунньах бэбиэскэтигэр Сунтаар улууһа тыа хаһаайыстыбатыгар 2013-2017 сс. үлэтин Иван Тихонов, агропромышленнай комплекс эйгэтигэр үөрэтии инникитин, кадровай бэлиитикэни Альберт Иванов, агрооскуолаҕа ыччаты үлэҕэ иитии-үөрэтии боппуруоһугар Куокуну орто агрооскуолатын дириэктэрэ Николай Иванов, «Кириэстээх» ТХПК үс сыллаах үлэтин, финансовой оздоровление ылыллыбытын түмүгэр инникитин туох сайдыы барыаҕын туһунан хаһаайыстыба бэрэссэдээтэлэ Владимир Егоров дакылааттаатылар.
Маны таһынан, тыа хаһаайыстыбатын миниистирин э.т. Александр Атласов Куокуну орто агрооскуолатын хаһаайыстыбатын, «Кириэстээх» ТХПК эбийиэктэрин, бааһыналарын үүнүүтүн, сиилэс хомуурун, Сунтаар нэһилиэгэр СӨ тыатын хаһаайыстыбатын министиэристибэтин бырагырааматынан тутулла турар сүүс уһаайбалаах «100 лет ЯАССР» микрооройуон тутуутун көрдүлэр. Сырыы бүтэһик күнүгэр Александр Павлович «Элгээйи» ПК-кэ сырытта.

Александр Атласов Сунтаар улууһугар хас да күннээх оробуочай сырыыта улуус тыатын хаһаайыстыбатын билигин турар тыын боппуруостарын быһаарарга, инники сайдыытыгар улахан суолталаах.

***

Тыа хаһаайыстыбатын  министиэристибэтин пресс-сулууспата.

Оставить комментарий    

!