Сунтаар эр бэртэрэ панкратиоҥҥа ситиһиилэннилэр

Панкратион диэн көрүҥүнэн сөбүлээн дьарыктанааччыларга анаан өрөспүүбүлүкэтээҕи «Битва Боотуров-11» диэн турнирга Уһук Илин федеральнай уокурук сүүмэрдиир Чөмпүйэнээтигэр Сунтаар эр бэртэрэ үчүгэй киирсиилэри көрдөрдүлэр.

Ол курдук ММА көрүҥүнэн дьарыктанар уолаттар, Сунтаартан Валериан Федоров (2 N-дээх оскуола 10 кылааһын үөрэнээччитэ, (58 кг) бастакы миэстэ) уонна Герман Соколов (Сунтаардааҕы колледж устудьуона) турнирга баран кытыннылар.

Уолаттары Сунтаарга бэйэлэрэ энтузиаст дьон Николай Степанов уонна Арсен Алексеев дьарыктыыллар. Бу икки кыттааччыны таһынан Сунтаар улууһун аатыттан билигин Дьокуускайга үөрэнэр, эрчиллэр Леонид Максимов (57 кг) иккис уонна улахан дьоҥҥо «Лучший бой» ааты ылан, анал бирииһи туппут Андрей Дмитриев (71 кг) бастакы, Никандр Бубякин (57 кг) үһүс миэстэ буоллулар.

Чэбдик олоҕу тутуһарга уһуйар, бу көрүҥү сэргээччилэри түмэн дьарыктыыр энтузиастартан биирдэстэрэ, тренер көмөлөһөөччүтэ Арсен Гаврильевич Алексеев санаатын маннык үллэстэр:

– Пандемия кэннэ чөл олоҕу өрө тутан, успуордунан таптаан дьарыктанааччыларга бырааһынньык кэриэтэ буолла. М.К.Аммосов аатынан ХИФУ тустуу саалатыгар бу күрэхтэһиигэ 75 киһи кытынна. Эдэр да, талааннаах да оҕолор уонна саастаах да уопуттаах дьон бааллара.

Сунтаар улууһугар ММА Федерацията 2020 сылтан хаттаан тэриллибитэ. Бэрэссэдээтэл Владимир Германович Федоров, толорооччу дириэктэр Владимир Владимирович Уаров. Сунтаарга баҕалаах уолаттары тренер Николай Александрович Степанов уонна мин көмөлөһөөччү быһыытынан дьарыктыыбыт. Герман уонна Валериан биһиэхэ иккиэн тэҥҥэ дьарыктана кэлбиттэрэ. Бу турнирга биһиги хамаандаттан Герман Соколов (57 кг) бастакы холонуута диэтэххэ, тэҥ киирсиигэ очукуонан баһыйтарбыта. Бэркэ кииристэ. Валериан Федоров 58 кг кыайыылааҕынан буолла.

Күрэхтэһии бэркэ ааста. Онон тэрийээччилэргэ, «Спортивный Панкратион” бэрэссэдээтэлигэр Федоров Дмитрий Николаевичка, судьуйалыыр биригээдэҕэ улахан махталбын тириэрдэбин. Билиҥҥи ирдэбили тутуһан күрэхтэһии сабыылаах ыытыллыбыта, онон быһа эфиры ыыппыт «Панчер» буокса кулууп хаһаайкатыгар махталбытын биллэрэбит. Маны тэҥэ биһигини өйөөбүт доҕотторбутугар, тренербытыгар Степанов Николайга, уолаттар спарринг партнердарыгар уонна күүс-көмө буолбут Федоров Владимирга, Уаров Владимирга, уолаттары куоракка диэри кэлэр-барар сырыыларын хааччыйбыт, Егоров Семен Егоровичка уонна бары ыалдьыбыт биир дойдулаахтарбытыгар ис сүрэхтэн улахан махталбытын этэбит. Турнир түмүгүнэн бу ый 26-28 күннэригэр Читаҕа Уһук Илин федеральнай уокурук панкратиоҥҥа Биирдиилээн бастыыр иһин уонна Чөмпүйэнээт тэриллэр. Манна биһиги, SUNTAR MMA хамаандаттан Федоров Валериаммытын ыыта сатыахпыт. Туох хайдаҕын, барарбытын барбаппытын, дьарык уонна үп-харчы, өйөбүл көрдөрүөҕэ.

***

Юлия АЛЕКСЕЕВА.