Быйыл биһиги улууска, тыһы көҕөнүнэн бултааһын муус устар 25 күнүттэн көҥүллэнэр уонна бэс ыйын 10 күнүгэр бүтэр. Онтон сааскы кус, хаас ыам ыйын 14 күнүгэр, ыам ыйын 23 күнүн киллэрэн туран, көҥүллэннэ. Бэс ыйын 1 күнүттэн бэс ыйын 4 күнүгэр диэри анды көҥүллэнэр.

Убаастабыллаах булчуттар истиилэригэр тиэрдэбит. Булт 209 №-дээх федеральнай сокуоҥҥа олоҕуран, булчуттар атыыр куска, хааска, андыга уонна тыһы көҕөнүнэн бултуурга, бастатан туран, көҥүл наада, ону Судаарыстыба экологияҕа кэтэбилин Ньурбатааҕы кэмитиэтиттэн ыларгытын умнумаҥ. Көҥүлэ суох бултуу барбаккыт, эриэйдэ кэмигэр түбэстэххитинэ сааҕыт былдьанарын өйдүүргүт наадалаах. Сааҕыт докумуонун илдьэ сылдьаргытын умнумаҥ. Бултуу бараргытыгар сааҕыт чехолга сылдьыахтаах, ботуруона суох буолуохтаах. Баһаартан сэрэхтээх буолуохтааххыт, табаах тобоҕун бэйдиэ быраҕымаҥ, иһиккэ илдьэ сылдьар ордук, оллооҥҥут уотун сэрэхтээхтик туттаргыт ирдэнэр.

Саха сирин Булт сокуонун 11-с №-дээх ыстатыйатыгар уларыйыы киирбитинэн сибээстээн, кус-хаас көҥүлүн эрдэттэн кэлэн ылыаххытын сөп.

Хаһан баҕарар айылҕаҕа тахсан булчуттар сирдэрин аһаталлар, байанайтан көрдөһөллөр. Сиэри-туому тутуһан бэрээдэктээх буолуохтааххытын санатабыт.

Аны туран тыһы көҕөнүнэн биир булчут 20 атыыр көҕөнү өлөрөрө көҥүллэнэр, онтон көннөрү кус көҥүлүгэр 30 кус көҥүллэнэр. Биир тыһы куһунан иккиттэн элбэх киһи бултуо суохтаах. Тыһыны өлөрдөххүнэ ыстараап тутуллар. Биир булчукка 5 хаас, 10 анды көҥүллэнэр.

Куһу айаҕынан үрэн угуйар көрүҥ эрэ көҥүллэнэр, араас сырдатар тэриллэринэн, мотуорунан сырса сылдьан бултуур көҥүллэммэт. Буруйдаахтары иниспиэктэрдэр дакаастаатахтарына, мировой суутунан бултуур быраапкыт балтараа сылга быһылларын өйдүөх тустааххыт. Иниспиэктэрдэр устар камералаах, фотоаппараттаах сылдьаллар.

Биһиги, ньурбалар, бу сааскы сезоҥҥа бэрээдэктээхтик, сокуону бары тутуһан, байанай төһөнү көрдөрөрүнэн, эһэкээн төһөнү бэрсэринэн сиэрдээхтик бултуохтаахпыт.

***
Ньурбатааҕы экологияҕа судаарыстыбаннай кэтэбил кэмитиэтэ

Сүрүн хаартыска GigaChat ИИ көмөтүнэн оҥоһулунна