Сабытарга кукуруза силигилии үүммүт

“Ил-Тосхол” тыа хаһаайыстыбатын кооператива тэриллэн үлэлээбитэ 5 сыл буолла, оттон сири кытта үлэни саҕалаабыта быйыл үһүс сыла. Бу кылгас кэм иһигэр тэрилтэ атаҕар туран сүөһү эбии аһылыгын бэйэлэрэ бэлэмнээн, оту оттоон үрдүк үүнүүнү ылары ситистилэр.

Тойбохойго, Аллыҥаҕа, Илимнииргэ, уопсайа 104 галаах сиргэ эбиэһи, озиманы уонна кукурузаны ыспыттара, үрдүгэ орто уҥуохтаах киһини ааһар гына силигилии үүммүт. Мантан кинилэр 800-900 туонна сиилэһи бэлэмниир былааннаахтар, маны тэҥэ 300-чэ туонна оту ылар сорук турар. 

«Ааспыт сылларга сүөһү аһылыгын 80% туораттан атыылаһан олорбуппут. Оттон дьэ, быйыл 100% бэйэбит бэйэбитин хааччыйар курдук үлэлээтибит, үүнүү туйгун» – диир хаһаайыстыба салайааччыта, уопуттаах урбаанньыт Нина Герасимова. 

***
Сунтаар улууhун пресс-сулууспата