Роман Дмитриев туһунан үтүө өйдөбүл сөҕүрүйбэт

«Строительнай» Атыы-эргиэн киинигэр ыытылла турар «Коркинныы олоруохха! Коркинныы айыахха!» диэн — ССРС, РСФСР, Саха АССР үтүөлээх тренерэ Дмитрий Петрович Коркин сырдык аатыгар; Саха Республикатыгар көҥүл тустуу сайдыбыта 70 сылыгар; Павел Пинигин, Роман Дмитриев, Александр Иванов Монреаллааҕы XXI сайыҥҥы Олимпийскай оонньууларга өрөгөйдөрүн 50 сылыгар анаммыт республикатааҕы таһымнаах быыстапка үгэннээн ыытылла турар.

Бүгүн, быыстапка тосхолун быһыытынан “Олимпийскай чемпион Роман Дмитриев дойдута – Эдьигээн” диэн тэрээһин буолла. Көрсүһүү наһаа истиҥ быһыыга-майгыга ыытылынна.

Тэрээһиҥҥэ ыраахтан-чугастан Роман Михайловиһы чугастык саныыр, ытыктыыр дьон мустан, маннык дьаһал тэриллибитигэр бастатан туран, быыстапка салайааччыта — Саха Республикатын култууратын үтүөлээх үлэһитэ Татьяна Афанасьевна Гоголеваҕа махталларын биллэрдилэр.

Сахалартан бастакы олимпийскай чемпион, ССРС спордун үтүөлээх маастара уонна үтүөлээх тренерэ Роман Михайлович Дмитриев аатыгар сүгүрүйэн уонна кэриэстээн — ис сүрэхтэн тахсар элбэх ахтыылар, санаалар этилиннилэр.

Ол курдук көрсүһүүгэ Ил Түмэн депутата Елена Христофоровна Голомарева, Эдьигээн улууһун баһылыгынан үлэлии сылдьыбыт Юрий Антонович Михайлов, Олимпиада-76 үрүҥ көмүс призера, спорт үтүөлээх маастара, Саха сирин үтүөлээх тренерэ Александр Николаевич Иванов, кини кэргэнэ Варвара Афанасьевна, кыыһа Альбина Александровна, Р.М. Дмитриев доҕоро Анатолий Алексеевич Сидоров, Саха сирин үтүөлээх тренерэ Николай Николаевич Константинов, уо.д.а. ыҥырыллан кэлэн, тэрээһин таһымын үрдэттилэр.

Эдьигээннээҕи кыраайы үөрэтэр музей (сотрудник Виктория Николаевна Семенова), Р.М. Дмитриев аатынан Олимпийскай эрэл училищетын Спорка Албан аатын музейа (салайааччы Николай Николаевич Константинов) уонна Ем. Ярославскай аатынан республикатааҕы кыраайы үөрэтэр музей — Р.М. Дмитриев спорка ситиһиилэрин, олоҕун кэпсиир-көрдөрөр сэдэх экспонаттары туруоран, быыстапканы киэргэтэн, сайыннаран биэрдилэр.

Истиҥ көрсүһүүгэ Эдьигээн улууһун общественноһа, киин куоракка олорор биир дойдулаахтара көхтөөхтүк кытыннылар. Түгэнинэн туһанан, Эдьигээн улууһун бастыҥ үлэһит дьонугар наҕараадалар туттарылыннылар.

Наҕараадаламмыттар ортолоругар, ыччаттарга көҥүл тустууга Россия кыайыылааҕа буолан, сотору кэминэн Россия сүүмэрдэммит хамаандатын аатыттан аан дойду түһүлгэтигэр туста бараары сылдьар Виктор Яковлев төрөппүттэрэ, “Илкэн” хаһыат сүрүн редактора Валентин Викторович Христофоров бааллар.

В.В. Христофоров: “В эти дни в Выставочном зале Строительного рынка идет выставка посаященная 50-летию триумфа якутян в Олимпийских играх Монреале. Руководитель проекта Татьяна Афанасьевна Гоголева. Сегодня свою богатую экспозицию представили жиганцы, откуда родом олимпийский чемпион по вольной борьбе Роман Михайлович Дмитриев. Среди многих гостей, друг Р.М. Дмитриева – Александр Николаевич Иванов с семьей, земляки, спортсмены, поклонники спорта. Среди других награжденных участников встречи отметили и меня – Почётный знак за вклад в развитие Жиганска. Спасибо организаторам и землякам!”, — диэн бэйэтин санаатын үллэһиннэ.

Ити курдук элбэх көрөөччүлээх, элбэх кыттааччылаах тэрээһини, бу быыстапкаҕа Эдьигээн улууһуттан эппиэттээх, музей үлэһитэ Виктория Николаевна Семенова кыайа-хото тутан үрдүк таһымнаахтык тэрийэн ыыппытын бэлиэтиир оруннаах.

Аны сарсын, балаҕан ыйын 9 күнүгэр күнүс 14:00 чаастан «Чурапчы – спорт туоната, олимпийскай чемпион Павел Павлович Пинигин дойдута» диэн «төгүрүк остуол» тэриллэр.

Дьокуускай куорат олохтоохторун уонна ыалдьыттары, «Строительнай» Атыы-эргиэн киинигэр ыытылла турар «Коркинныы олоруохха! Коркинныы айыахха!» республикатааҕы таһымнаах тэрээһини кэлэн көрөргүтүгэр, сыаналыыргытыгар ыҥырабыт.

***

Петр ПАВЛОВ

Ааптар хаартыскалара