ОТ ҮЛЭТЭ ТЭТИМИРЭР

Быйыл сайын саҕаланыыта сөрүүн буолан уонна арыылартан уу түспэккэ от үлэтигэр мэһэйдэри үөскэппитэ. Ону таһынан от ыйын бүтүүтэ, атырдьах ыйын саҕаланыыта ардахтар кэлэ кэлэ түһэ турар буоланнар үлэ хаамыыта өссө уустугурбута. Ол эрээри кэнники күннэргэ күн туран ханна да от үлэтэ тэтимирдэ.

«Туймаада» Агрохолдинг хаһаайыстыбалара сайын устата 7570 тн от бэлэмниир соруктаахтар. Ону таһынан 9800 тн сиилэс уонна 2175 тн сенаж бэлэмнииргэ сорук турар.

Хаһаайыстыбалары биирдиилээн ылар буоллахха, атырдьах ыйын 18 күнүнээҕи туругунан “Кладовая Олекмы” ХЭУо былаанын 64,5% толорон 497 тн оттоммут,ону тэҥэ 100 тн сенажтаах. Бу хаһаайыстыба сенажка былаана 525 тн.“Туймаада” Экоферма 2400 тн от бэлэмниир былааннаах. Билиҥҥи туругунан икки хаһаайыстыбанан 1420 тн оту бэлэмнээбиттэр. Бу тэрилтэ 3050 тн сиилэһи бэлэмниир былааннаах. Бүгүҥҥү туругунан 1800 тн сиилэһи укпуттар. Онтон “Бөртө сылгы собуота” хаһаайыстыба 1547 тн оттоох.Былаана 3000 тн. Бу хаһаайыстыба быйыл үүнүү үчүгэй буолан 1600 тн cиилэс угар былааннаахтарын аһаран  сиилэстэрин 1929 тн тириэрпиттэр. Ону таһынан 202 тн сенаж бэлэмнээбиттэр.

“Совхоз “Новый” АУо быйылгы сайын 400 тн оту оттуур былааннааҕыттан 88 тн бэлэмнээбиттэр. Ону тэҥэ 605 тн сиилэс укпуттар. Сиилэскэ былааннара 1450тн. “Победа”хаһаайыстыба кыстыкка киириэххэ диэри 1000 тн оту оттуохтаах. Бу күннэрдээҕи туругунан 300 тн оту бэлэмнээбиттэр.

Уопсайынан ыллахха агрохолдинг үрдүнэн 3852 тн от бэлэмнэммит. Ол аата былаан 50,9% туолбут. Сиилэс 44,2% туолан, билиҥҥи туругунан 4334 тн сиилэс угуллубут. Онтон сенажка хаһаайыстыбалар дьэ киирэн эрэллэр. Ол курдук 322 тн сенаж бэлэмнэммит. Билигин күн дьыл туран биэрдэ. Хаһаайыстыбалар отчуттара өбүгэлэрбит үтүө үгэстэрин тутуһан сайыҥҥы биир күн сылы туоратар диэн муударай этиигэ тирэҕирэн хас биирдии күнү тутуһан тиритэ-хорута ходуһаларга үлэлии сылдьаллар. Онон наада буолар отторун булунуохтара диэн эрэл баар.

***
Прокопий ХАБАРОВ