ОЛОҤХОЛУОХХА УОННА МУҤХАЛЫАХХА!

Улуус аҕа баһылыга Анатолий Григорьев уонна аҕалар түмсүүлэрин көҕүлээһиннэринэн Олоҥхо муҥхата Аллыҥа нэһилиэгэр ыытылынна. 

Көчүй диэн улахан күөлгэ оскуола оҕолоро уонна муҥханы таптааччылар, барыта 260ча киһи муһунна, ол иһигэр 179 оскуола оҕото. Сарсыарда 9 чаастан хара киэһээҥҥи диэри оҕолор муҥха ньыматын, араас албастарын сэргии көрдүлэр, үлэ көрүҥэр барытыгар холоннулар. Ньырыыһыттар – балыгы үүрээччилэр, анньыыһыттар – лункалары оҥорооччулар, чардаат – муҥханы түһэрэр, ылар сир, курдук тыллары эндэппэккэ билэр буоллулар. Онон үүнэр көлүөнэни төрүт үгэскэ сыһыаран, айылҕаҕа сылдьыы сиэрин-туомун тутуһалларыгар үөрүйэҕи иҥэрэн бэрт тэрээһин буолла.

Барыта 3 муҥха түстэ. Ол аата Көчүй күөлэ улаханын туоһулуур. Балыгы күрүчүөктүү үүрэн киллэрэн, 21 куул балыгы ыллылар. Күөх боллох бэлэҕэ хас биирдии киһиэхэ тиксэн, сахалыы сэмэйдик үөрдүбүт, астынныбыт.

Ону тэҥэ култуура эйгэтин үлэһиттэрэ Аллыҥа кулуубугар олоҥхолоон доллоьуттулар. Оҕолор сыалы ытыы, маһы эрбэтии курдук күрэхтэргэ кииристилэр.

Дьаархан фермерэ Василий Васильев биир атах этинэн спонсордаан, кулуһуҥҥа сибиэһэй миин, соркуой, плов курдук аһы Аллыҥа асчыттара астаан күндүлээтилэр.

***

Сунтаар улууһун дьаһалтатын пресс сулууспата