Олоҥхо күнэ

Олоҥхо саха омук былыыр былыргы дьыллар быыстарыттан сырдык уонна хараҥа, айыы уонна абааһы аймахтара утарыта турууларын, күрсүүлэрин туһунан уостан уоска бэриллэн кэлбит уус-уран айымньыта. Олоҥхо киһи өркөн өйүн күүһүн күдэҕин кыаҕынан айыы аймаҕын күөмчүттэн көмүскүүр үрдүк аналын хоһуйар.
2005 сыллаахха сэтинньи 25 күнүгэр, ЮНЕСКО олоҥхону аан дойду култууратын биир саамай чаҕылхай шедеврынан биллэрбитэ. Нөҥүө сылыгар СӨ бэрэсидьиэнин N 3036 Ыйааҕынан 2006 сыл сэтинньи 15 к. Саха Өрөспүүбүлүкэтигэр сэтинньи 25 күнэ Олоҥхо күнэ быһыытынан биллэриллибитэ. Бу күҥҥэ олоҥхону киэҥ араҥаҕа тарҕатар, үйэтитэр соруктаах тэрээһиннэр ыытыллыахтаахтар.
АЛААТЫЫР АЛА ТУЙГУН
… Аһыныылаах санаалаах
Абырыы кэлбит
Айыыбыт оҕото,
Өрүһүйэ кэлбит
Үтүө киһибит
Ханнаный диэн,
Өрө көрөн таһаарбыттара –
Кылааннаах өргөстөөх
Кыыс Ньургун бухатыыр
Уһун субуй батаһын
Таҥнары тайахтанан
Өргөстөөх үҥүүтүн өрө тутан
Дьоһуннаахтык туттан,
Дьиппиэнник тирэнэн,
Үүммүт курдук үктэнэн,
Үскэллээх көрүҥнэнэн,
Үтүө мөссүөннэнэн
Өстөөҕүн диэки
Тууспаннаахтык-хатааннаахтык
Турулуччу көрөн,
Супту одуулаһан турар эбит…
***
«Алаатыыр Ала Туйгун» олоҥхоттон
Оставить комментарий