Курс валют
$
76.35
0.08
89.25
Курс валют
Курс валют
$
76.35
0.08
89.25
Меню
Поиск по сайту

Ньурбаҕа Ыһыаҕынан алгыс ыытылынна

22.06.2020 06:56 2
Ньурбаҕа Ыһыаҕынан алгыс ыытылынна

Үрүҥ тунах Ыһыахтарынан Сахабыт сирин алгысчыттара самаан сайыны көрсө сиэри-туому тутуһан алгыс толороллор. Ньурба улууһун култуура департаменыгар алгыс ыытылынна.


Алгыс иннинэ онлайн ситим нөҥүө Ньурба улууһун баһылыга Алексей Михайлович Иннокентьев, култуура департаменын салайааччыта Розалия Михайловна Тихонова олохтоохтору ыһыаҕынан эҕэрдэлээтилэр.

 

«Аар-Айыы» итэҕэлин XI кэрдиистээх алгысчыта, үрдүк категориялаах норуот эмчитэ, норуоттар икки ардыларынааҕы ЮНЕСКО иһинэн норуоттар мэдиссиинэлэрин магистра, Таркаайы нэһилиэгин бочуоттаах олохтооҕо, үлэ бэтэрээнэ Алиса Михайловна Иннокентьева сиэри-туому тутуһан алгыс эттэ.

Алиса Михайловна Ньурба улууһун Марха нэһилиэгиттэн төрүттээх. Аҕалаах ийэтэ икки өттүттэн баардаахтарын бэрсэн, 1996 сыллаахтан дьону эмтииллэр. Аҕата айылҕаны кытары алтыһарын сөбүлүүрэ, айылҕа киһитэ буолан, дьоҥҥо-сэргэҕэ сири ньүөлсүтүүгэ уо.д.а. боппуруостарга сүбэ-ама биэрэрэ, отоһут буолан, кыыһын эмтээх оттору хомуйууга үөрэппит. СӨ наруодунай мэдиссиинэтин Ассоциациятын бэрэсидьиэнэ Владимир Кондаков ыытар үөрэҕэр Саха сиринээҕи норуот эмчиттэрин Ассоциациятыгар киирэн, айыылыы (духуобунай) эмтээһиҥҥэ, «Аар-Айыы» итэҕэлин алгысчыт үөрэҕэр 2000 сыллаахтан үөрэнэн, сэттэ сыллаах институту бүтэрэн судаарыстыбаннай дипломнаах, уон биирис кэрдиистээх алгысчыт аатын ылбыт.
Алиса Михайловна нэһилиэгин ыһыахтарыгар, улууска ыытыллар саҥа тутуулар үлэҕэ киирэллэригэр, Марха муостатын тутуутугар инженернэй түһүмэҕэр уонна ааспыт сыллаахха үөрүүлээх аһыллыытыгар алгыс оҥорбута.

– Үрүҥ тунах Ыһыах кэмигэр Аар Айыыларбыт түһэн дойдуну, сири, дьону-сэргэни алгыыр кэмнэрэ буолар. Үрдүк Айыыларбытын ааттаан, аал уоппутун оттон, дьоммут-сэргэбит олохторун туһугар уйгуну-быйаҥы, үтүө сайыны түстүүрүгэр, ураа муостаах, сыспай сиэллээх элбииригэр, дьоммутун-сэргэбитин арчылыылларыгар көрдөһөбүн. Аан дойдуну аймаабыт дьаҥ ыарыыта тэнийбэтин туһугар күрүөлээн-хаһаалаан, төттөрү тэйитэр алгыһы ыыттым.

Ньурба улууһун дьоно-сэргэтэ инники кэскилбит, кэлэр кэнчээри ыччаппыт чэгиэн-чэбдик туруктаах, киэҥ көҕүстээх буолалларыгар, өй-санаа өттүнэн күүһүрэллэригэр, бөҕө-таҕа куттаах, бу олоххо ыарахаттары туоруурга тулуурдаах, дьулуурдаах дьон буолан үүнэн-сайдан тахсалларыгар алгыспын тиэртим. Саастаах өттө ыччакка сүбэ-ама буолан көмөлөһөрүгэр алҕаан туран, бары киэҥ көҕүстээх, күүстээх санаалаах буолан сомоҕолоһон, бииргэ түмсэн үлэлээн-хамнаан дьоллоох-соргулаах буолуҥ! Алгыс баһа сыаланнын! Дом!

***

Ааптар: Антонина СЕМЁНОВА

Обсуждение • 2

Добавить комментарий
  1. Хм...

    Ньурбаларбыт аны уулусса ортотугар ыһыахтыыр буолбуттар дуу…
    Итинтэн чугас паркалаахтар этэ дии, эбэтэр «Кыталыктаахтарыгар» массыынанан тиийэн оҥоруохтарын.

  2. нюрбинский тупик

    Хм вы правы

Оставить комментарий