Курс валют
$
76.04
1.01
90.01
1.05
Курс валют
Курс валют
$
76.04
1.01
90.01
1.05
Меню
Поиск по сайту

Ньурбаҕа аһаҕас халлаан анныгар киинэ көрдөрүүнү саҕалаатылар

19.08.2020 12:53 0
Ньурбаҕа аһаҕас халлаан анныгар киинэ көрдөрүүнү саҕалаатылар

Атырдьах ыйын 18 күнүттэн Ньурба улууһун култуура департамена сонун бырайыагын саҕалаата. Ити күн киэһэ 9 чааска боруобалааһын быһыытынан аһаҕас халлаан анныгар “1917” диэн киинэ көрдөрдүлэр. Социальнай ситимнэринэн биллэрии тарҕанан, баҕалаах дьон 20-чэ массыынанан кэлэн көрдүлэр.


Билигин коронавирус инфекциятынан сибээстээн Саха сиригэр хааччахтааһын миэрэлэрин устуу 3-с түһүмэҕэр киирэ иликпит. Инньэ гынан култуурунай-маассабай тэрээһиннэр, кинотеатрдар үлэлэрэ көҥүллэнэ илик. Ол эрээри дьон иллэҥ кэмин көдьүүстээхтик атаарарыгар наадыйыы улахан. Дьокуускайга аһаҕас халлаан анныгар киинэ көрдөрүүтүн саҕалаабыттарын истэбит-билэбит. Ньурба улууһун баһылыга атырдьах ыйын 18 күнүгэр дьоҥҥо аһаҕас халлаан анныгар, эпидемиологическай быраабылалары тутуһан туран, киинэ көрдөрүүтүн туһунан боппуруоһу быһааралларыгар эппитэ. Улуустааҕы култуура департаменыгар уонна Ньурбатааҕы оҕо научнай-тэхиниичэскэй айымньытын киинин иһинэн “Юнион” кинотеатрдаах улуустааҕы үөрэх управлениетыгар сорудахтаабыта. “Дьокуускайга сатанар тоҕо биһиэхэ сатаныа суохтааҕый?” диэн боппуруос быһаччы туруоруллубута.

Ити дорҕооно сүтэ да илигинэ култуура департамена түргэнник тэхиниичэскэй өттүн быһааран, киэһэтигэр бастакы Аан дойду сэриитин туһунан дьоҥҥо номнуо сөбүлэппит киинэ көрдөрүлүннэ. Дьон итини биһирээтэ. Улуус салалтата киинэ көрөр массыыналаах дьоҥҥо табыгастаах буоларын курдук киинэ тыаһын-ууһун олохтоох араадьыйанан бэрдэрэргэ, дьон дьиҥнээх кинотеатрга курдук попкорн, суок атыылаһарын курдук быраабыланы барытын тутуһан атыыны тэрийэргэ, бөҕү-саҕы мээнэ бырахпаттарын курдук бөх уурунатын туруоралларыгар уо.д.а. сорудахтаата.

Аһаҕас халлаан анныгар улахан экраҥҥа киинэ көрүүтүн тэрийии ыччат иллэҥ кэмин туһалаахтык атаарарыгар эрэ аналлаах буолбакка, буруй оҥоһуллуутун сэрэтии үлэтин биир көрүҥүнэн буолар.

***

Геннадий АНТОНОВ

Оставить комментарий