«Улуус үрдүнэн туорахтаах бурдук 300 гааҕа эбиэс уонна 18 гааҕа сэлиэһинэй ыһыллыахтаах, — диир кини. — Итини таһынан сиилэскэ уонна сенажка 378 гааҕа «вико-овсяная смесь» ыһыллар. Күндээдэ АО горох ыһан боруобалаан көрөөрү сылдьар, сииктээх сирин талан ыһыллыахтаах сирин көрөн киирдим. Бобовай иҥэмтиэтэ уонна белога элбэх, итиэннэ сиилэскэ от маассалаах буолар. Өрөспүүбүлүкэ үрдүнэн горох-эбиэс булкааһын ыһар уопуттаахтар, онон боруобалаан көрүөхпүт.
Быйыл Кыталыктаах бааһыната толору ыһыллыаҕа. Итини таһынан 45 гааҕа кукуруза уонна подсолнух ыһан көрүөхпүт, сиилэскэ отун маассатын туһаныахпыт. Исписэлиистэр сүбэлэринэн Саха сиригэр үүнүөн сөптөөх, кылгас кэмҥэ ситэр диэн, кукуруза «Катерина» суордун уонна подсолнух «Кулумдинскай» суордун таллыбыт. Сирбитин бэлэмниэхпитигэр диэри сиэмэбит кэлиэҕэ. Үчүгэй буоллаҕына эһиилгиттэн ыһыытын улаатыннарыахпыт.
Эмиэ иҥэмтиэлээх буоллун диэн, сиилэскэ бобовай булкаастаах эбиэһи («мышиный горошек вико-овсяная травосмесь»), судургутук эттэххэ — эбиэһи кытта моҕотой күрүөтүн ыһан эрэбит. Үүннэриллибит моҕотой күрүөтэ ходуһа моҕотой күрүөтүнээҕэр ото элбэх буолар. Оннук сиэмэбит кэлэн сытар. Онон сүөһүбүт аһылыгын тупсаран элбэх үүтү ылаары, саҥа саҕалааһыннары олоххо киллэрэн эрэбит.
Быйылгыттан Мелиорация управлениетын Ньурбатааҕы филиалын базатыгар Кормовой киин тутуллуохтаах. Бу оҥорбут сиилэспитин, сенажпытын, ылбыт бурдукпутун уонна кыһын эбии компоненнары аҕалан булкуйан, сүөһүгэ симэһиннээх аһылык быһыытынан монокорм оҥорон таһаарыахтаахпыт.
Ньурба өттүгэр сүөһү аһылыгар анаан бүтүннүүтүн А.Б.Васильев салайааччылаах мелиорация тэрилтэтэ ыһыаҕа. Куочай кытыытыгар Баҕалаах бааһынатыгар өрөбүлгэ 1 дискаторынан сиик саптара киирдилэр. 2-3 тиэхиньикэни Кыталыктаахха булууктата киллэриэхпит.
Быйыл 1400 т сиилэһи уонна 600 т сенаһы бэлэмниир соруктаахпыт. Элбэх сыллаах от сиэмэтэ ыһыллыахтаах. Сүлэ бааһыналарыгар сир кырсын алдьаппакка үлэлиир «Вредо» сиэйэлкэнэн эбии түһэрэн ыһыахпыт («подсев»).
Быйыл кормопроизводство бырагырааматынан Күндээдэҕэ — 2 км уонна Кыталыктаах бааһынатыгар 5 км саҥа күрүө тутуллуохтаах. Итини таһынан 10 км күрүө өрөмүөннэниэхтээх: Ньурбатааҕы кормовой хампаанньаҕа – 4 км, «Күндээдэ» АУо-ҕа – 3 км уонна Кыталыктааахха «Ньурба-Агро МТС»-ка — 3 км.
Ыһыы бүппүтүн кэннэ эмиэ кормопроизводство бырагырааматынан 100 гааны таҥастаан эбии бааһына оҥостуохтаахпыт. Сири таҥастыыр оборудование ылыллыахтаах. Онон быйыл сир үлэтигэр былааммыт элбэх, сыал-сорук улахан».
***
Геннадий АНТОНОВ
Оставить комментарий