«НЕФРОКЛИНИКА» салайааччытын М.Н. Бурцеваны кытары билсиһиҥ.
— Дьонум, аймахтарым Уус-Алдаҥҥа бааллар. Улааппыт, оскуолабын бүтэрбит сирим Нам буолар. Дьокуускайдааҕы медицинскай институт “Педиатрия” салаатын бүтэрэн, үлэһит буолан специалист быһыытынан сайдыбыт сирим Дьокуускай куорат. Үөрэхпин бүтэриэхпиттэн күн баччааҥҥы диэри 25 сыл устата быраас идэтин баһылаан, эбии кэтэхтэн юридическай үөрэҕи бүтэрбитим. Бастаан оҕо бырааһынан үлэбин саҕалаабытым, ол кэннэ суһал көмөнү оҥорор кииҥҥэ сүрүн быраас Елена Никифоровна Лыткина солбуйааччытынан ыҥырыллан улахан оскуоланы ааспытым. Кини салайааччы быһыытынан өйөөн, үөрэтэн-такайан кэлин Доруобуйа харыстыбылын министиэристибэтигэр кылаабынай специалиһынан – инбэлииттэри эминэн-томунан хааччыйар боппуруостарын быһаарыытынан дьарыктаммытым. Ол кэмҥэ Доруобуйа харыстыбылын миниистирэ Александров Вячеслав Лаврентиевич, Вербицкая Людмила Ильясовна – курирующай замым — маннык үрдүк таһымнаах дьону кытта алтыһан киэн далааһыннаах билиини ылбытым, — диэн кэпсиир Марфа Николаевна.
Онтон кэлин доруобуйа харыстыбылын миниистирэ Горохов Александр Владимирович, билигин Карелия Республикатыгар миниистирдии сылдьар Охлопков Михаил Егорович курдук дьону кытары үлэлээбиппиттэн киэн туттабын. Михаил Егорович миигин Өлүөхүмэҕэ кылаабынай бырааһынан анаан үс сыл сиринэн хаамаммым — нэһилиэнньэни кытары ыкса үлэлээн, алтыһан, оройуон олохтоохторун кыһалҕаларын бэркэ билбитим.
2020 сыллаахха миигин Дьокуускайга диализ центрыгар дириэктэринэн анаабыттара. Бүөр ыарыытынан дьарыктаммытым номнуо 5 сылым буолла. Дьылҕа-хаан ыйыытынан кэнники үһүс сылбын Ньурба дьонун-сэргэтин доруобуйатын туһугар «Нефроклиника» киинин арыйан үлэлии сылдьабын. Дьокуускай куоракка «Нефроклиника» филиала эмиэ баар. Бүтүн Сахабыт сирин туох баар дьоно кэлэн бүөрдэрин көрдөрөн бараллар.
— «Нефроклиника» Ньурбаҕа арыллыытын туһунан.
— 2021 сыллаахха Антонина Афанасьевна Григорьева, ол кэмҥэ Ньурбаттан Ил Түмэн депутата: «Диализнай киин оройуоҥҥа арыллыан сөп дуо?» диэн ыйыппытыгар «Сатаммат» диэн тылы туттубат киһи: «Тоҕо сатаныа суоҕай? Баҕа эрэ наада, олохтоох дьаһалта, оройуон балыыһата күүс-көмө буолар буоллахтарына арыллыан сөп» диэн хоруйдаабытым. Итинтэн салгыы толкуйданан, 2022 сыл кулун тутар ыйыттан билиҥҥи үлэбит төрүөтэ саҕаламмыта. Ньурба оройуонун баһылыга Алексей Михайлович Иннокентьев Ньурбатын тустаах олохтоохторун кыһалҕаларын өйдөөн, биир сүбэҕэ киирэммит, уруккута гранильнай завод дьиэтигэр — билигин музей, библиотека дьиэтигэр, СанПин ирдэбилинэн таас дьиэ буолуохтааҕын тутуһан, оройуон үбүнэн өрөмүөн үлэтэ саҕаламмыта. Кииммит атырдьах ыйын 18 күнүгэр 2023 сыллаахха арыллыбыта. Ил Дархаммыт Айсен Сергеевич Николаев үөрүүлээхтик үлэбитин тутан барбыта. Онтон ыла атырдьах ыйын 20 күнүттэн ыарыһахтарбытын көрөн-истэн олоробут.
— «Нефроклиника» үлэтин туһунан сиһилии.
— «Нефроклиника» үлэтин туһунан Ньурба оройуонун дьонугар-сэргэтигэр сырдатан кэпсиир буоллахха маннык: 3 оройуон ыарыһахтара кэлэн эмтэниэхтэрэ диэн былааннаах, инникитигэр 10 искусственнай бүөр аппаратын туруоруохпут, 60 киһини эмтиэхпит диэн улахан масштабнай бырайыак оҥорбуппут. Билигин үлэлиир дьонум ахсаана 7 киһи. Олохтоох дьон: 2 мед.сиэстирэ, санитарка, администратор, инженер, рабочайдаахпыт уонна нефролог бырааспыт Джумаков Э.С.. Олохтоох дьоҥҥо үлэ миэстэтин таһаарбыппыт эмиэ улахан ситиһиибит диэн сыаналыыбын. Бүөр бырааһа ОМС страховкатын нөҥүө Ньурба, Сунтаар, Үөһээ Бүлүү олохтоохторун босхо консультациялыы олорор. Үлэлээбиппит 1,5 сыл буолла. «Жизнь без диализа», «Продлеваем жизнь почки — без диализа» диэн бырагыраамаларынан үлэлээн дьон олоҕун уһата сылдьабыт.
— Ким көрдөрүнүөн сөбүй «Нефроклиникаҕа»?
⁃ Латыын тылыттан «нефро» диэн тылы сахалыы тылбаастаатахха «бүөр» диэн буолар. Биһиги клиникабытын дьон бүгүҥҥэ диэри тумнан хаама сылдьаллар диэн этиэхпин баҕарабын. «Ыараханнык ыалдьа сылдьар, диализ эрэ ылар дьон көрдөрөллөр» диэн санаа баар. Оннук буолбатах. 3 улуус бэйэлэрин терапевтарыттан туһаайыылаах кэлэннэр бүөрдэрэ хайдах үлэлиирин, сайҕыыр үлэтин бэрэбиэркэлэтиэхтэрин сөп. Аны туран, бүөр ыарыыта үрдүк хаан баттааһыннаах, сахарнай диабеттаах, подагрический артриттаахтарга — подагрическай нефропатия диэн баар буолар, ол аата сүһүөхтэрэ ыалдьар, ити этиллибит ыарыылардаах дьон хайаан даҕаны кэлэн көрдөрүөхтээхтэр. Тымныы дойдуга олорор буоларбытынан сибээстээн Сахабыт сиригэр сүһүөхтэрэ ыалдьар дьон наһаа элбэх.
— Диализ диэн тугуй?
⁃ Киһи бүөрэ хаан ыраастыыр, куһаҕан эттиктэрин (шлагын) таһаарар функцията мөлтөөн, фильтрдара хатан, иикпитигэр баар минераллары, туох баар мустубут куһаҕан эттиктэри хомуйан таһаарар үлэтэ сатараатаҕына киһи аҥаардас ууну эрэ таһаарар буолан хааллар. Бу киһи «аппарат искусственной почки», ол эбэтэр «диализ» эрэ көмөтүнэн үйэтин уһатан сатаан олорор кыахтанар. Нэдиэлэҕэ үстэ, кырата 4-5 чаас, сөптөөх диетаны тутуспат буоллаҕына күн аайы сылдьаллар. Дьон олоҕо аппараттан тутулуктаах буолар. Иннэ гынан биһиги үлэбит ыарахан. Ньурба оройуонугар «высокотехнологичнай» көмө диэн буолар. Ону тэҥэ бүөрү харыстыыр үлэни эмиэ ыытабыт. Өссө төгүл даҕатан эттэххэ, эмтиир терапевт бырааскытыттан туһаайыы (направление) ылан, бэлэм узилаах, анализтаах кэлэн буор-босхо бүөргүтүн көрдөрүөххүтүн сөп.
-Сахабыт сирин үрдүнэн Ньурба оройуона үтүө холобур буолла.
⁃ Норуот туһугар кыһаллар салайааччылаах, дьаһалталаах буолаҥҥыт бу биһиги Ньурбаҕа кэлэн үлэлии-хамсыы, дьон олоҕун уһатар үлэбитин ыыта сылдьабыт диэн этиэхпин баҕарабын. Правительство мунньаҕар Сунтаар, Чурапчы улуустара туруорсубуттара. Биһиги сүрүн сыалбыт диализка сылдьар ыарыһахтар бэйэлэрин дойдуларыгар олохсуйан эмтэнэллэрин туһугар диэн анаан арыллыбыппыт. Уруккута диализтаах дьон дьиэлэрин-уоттарын, үлэлэрин быраҕан тураннар, Дьокуускайга көһөн барыахтарын наада буолар этэ, ол эрэн билигин Ньурбаҕа ханна да көспөккө үрдүттэн олорон көмө ыларга кыах үөскээтэ. Дойдуларыгар ыһыахтыы, сайын сайылыы, саҥа дьыллыы — «гостевой диализка» кэлэн барбыт ыарыһахтар хайҕаан бараллар.
Бу 1,5 сыл иһигэр 80 киһи көрдөрүнэн 26 киһи учуокка турда — ити үрдүк көрдөрүү буолар. Учуокка турар дьоммутуттан 2 киһи кэмигэр бүөрдэрин уларытан саҥа бүөр олордоттулар, 3 киһи эмтэнэн Медицина киинигэр диализ ылаллар. Билигин диализка 11 киһи мэлдьи сылдьар. Бүлүү бөлөх оройуоннарыгар бүөр ыарыыта үрдүк көрдөрүүлээҕин туоһулуур көрдөрүү буолар. Дьон эрдэ-сылла көрдөрүнүөн наада, реанимацияҕа диэри тириэрдибэккэ.
Аан дойду бүөр күнүгэр анаан кулун тутар 16 күнүгэр Ньурбаҕа «Аһаҕас аан күнүн оҥоруохпут», — диэн кэпсээнин түмүктээтэ «Нефроклиника» салайааччыта Марфа Николаевна Бурцева.
Доруобуйаҕытын эрдэттэн харыстааҥ, баар өҥөнү толору туһанан, бүөргүтүн көрдөрүҥ, чэгиэн-чэбдик туруктаныҥ!
«Нефроклиника» үлэлиир аадырыһа:
Ньурба к., Степан Васильев аатынан уулусса, 123а дьиэтэ.
Администратор +79142810891
Сайт: nefroclinicykt.ru
***
Ньурбатаа5ы улус дьаһалтатын пресс-сулууспата
Оставить комментарий