Бу күн сынньанар пааркабытыгар -сайын аайы уйгу быйаҥ ыһыаҕын ыһар ытык сирбитигэр — биир умнуллубат, бэртээхэй тэрээһин ыытылынна. Ол курдук, улуус 26 нэһилиэгин түһүлгэтэ ыалдьыттары үөрэ-көтө көрүстэ. Бу аҕыйах кэм иһигэр бары нэһилиэктэр турунан туран үлэлээн, күннэрин-дьылларын аахсыбакка киирэн бэртээхэй ураһалары туппуттара ойуурунан ат сүүрдэр ипподроммутугар барар суолбут икки өттүнэн кэчигирэһэ турбуттар. Хас биирдии нэһилиэк ураһатыгар бастыкы ыалдьыттарынан — СӨ судаарыстыбаннай мунньаҕын бэрэссэдээтэлэ Алексей Еремеев, СӨ Бырабыыталыстыбатын бэрэссэдээтэлин солбуйааччы Сергей Местников, улууспут баһылыга Анатолий Григорьев буоллулар. Нэһилиэктэр олохтоохторо бэйэлэрин ураһаларыгар ыалдьыттары уохтаах кымыһынан, арыылаах алаадьынан айах тутан көрүстүлэр, нэһилиэктэрин олоҕун-дьаһаҕын билиһиннэрдилэр. Ил Түмэн спикерэ Алексей Еремеев хас блиирдии сылдьыбыт ураһатыгар дьону кытары сүрдээх истиҥник кэпсэттэ, олохтоохтору Ыһыаҕынан эҕэрдэлээтэ. Холобур, Арассыыйа Үлэҕэ Дьоруойа Владимир Михайлович олорор, үлэлиир нэһилиэгин ураһатыгар Үлэ Дьоруойун кытары кытары илии тутуһан, үүтү, быйаҥы үрүйэлии сүүрдэр тыа хаһаайыстыбатын кээпэрэтиибэ бу күҥҥэ туох-хайдах дьаһанан, үлэлээн-хамсаан олороллорун туоһуласта. Үлэни өрө туппут кириэстээхтэргэ бары үтүөнү баҕарда. Салгыы Тэҥкэ нэһилиэгин ыччаттара туппут ураһаларын көрөн-истэн астынна. Эдэр дьоҥҥо үлэлэригэр, олохторугар ситиһиини баҕарда. Быйыл туус хостоммута 385 сылын бэлиэтээри олорор Кэмпэндээйи нэһилиэгин ураһатыгар кулууп дириэктэрэ Анна Тотонова ыалдьыттарга нэһилиэк талааннаах далбар хотуттарын үлэлэрин көрдөрө-көрдөрө киэн тутта кэпсээтэ. Улууспут баһылыга Бырабыыталыстаба бэрэссэдээтэлин солбуйааччы Сергей Местниковтан, Ил Түмэн бэрэссэдээтэлэ Алексей Еремеевтэн өрөспүүбүлүкэҕэ тутуллар уһуйааннарга, оскуолаларыгар туус хоһо баар буоларын туһугар үлэлэһэллэригэр баҕа санаатын эттэ. Билигин хас да улууска туус хосторо бааллара оҕолор доруобуйаларыгар олус туһалааҕа билиннэ диэн баһылыкпыт астына кэпсээтэ.
Дьэ бу курдук, улуус нэһилиэктэрэ ыһыах кэмигэр түөлбэлээн мустар, дьоннорун-сэргэлэрин көрсөр бэртээхэй ураһаламмыттара олус үчүгэй. Бу тутуулар үйэлээх буоллуннар, улуус дьонун сомоҕолуу турдуннар.
Яина ВЛАСЬЕВА
Оставить комментарий