Наталья бэйэтэ тыа хаһаайыстыбатыгар сыһыаннаах буолан, бу эйгэни куруук интириэһиргии көрөрө. Бастаан сылгыларынан дьарыктаныан баҕара сылдьыбыт, ол эрээри уопуттаах фермер Аксиния Васильевна Левина сүбэлээн, Майя Степановна Гуляеваны кытта билсэн, кэпсэтэн куурусса иитиитин талбыта. Бастакы кууруссаларын былырыын Бүлүүттэн Мария Иванова «Кынаттар» диэн тэрилтэтэ бэлэхтээбит.
Бэйэтэ кэпсииринэн саҥа дьыаланы саҕалыырга саамай уустугунан граҥҥа кыттарга докумуон хомуйсуута буолбута. Ол эрээри, Кэбээй улууһун администрацията, КУМи-лар, улуус тыатын хаһаайыстыбатын салалтата уонна сүбэ-ама буолбут чугас дьоно күүс-көмө буоланнар, докумуон үлэтин этэҥҥэ ааспыттара.
Былырыын Наталья Саха Өрөспүүбүлүкэтин Тыа хаһаайыстыбатын министерствотыттан фермердары өйүүр анал «Агростартап» грант-субсидиятыгар кыттан көмө харчы ылбыта. Бу үп саҕалааһыҥҥа, бастакы хардыыны оҥороругар олус улахан тирэх буолбута. Билигин бу көмөнү туһанан бэйэлэрин саҥа фермаларын тута сылдьаллар.
Билигин хаһаайыстыба сүрүннээн эт кууруссатын иитэр, ону таһынан сымыыттыыр кууруссалардаах уонна хаастаахтар. Эбии инкубационнай сымыыт ыланнар, өссө 250 төбөнү инкубатордаан таһаарар былааннаахтар.
Ферма үлэтин күннээҕи тэриллиитин уонна бэйэ дьыалатын саҕалыан баҕарар дьоҥҥо туһалаах сүбэлэрин туһунан толору кэпсэтиини хаһыаппыт кэлэр нүөмэригэр ааҕыҥ.
***
Татьяна Левина, Дабаан
Оставить комментарий