Галина ПОПОВА-Санаайа саҥа кинигэтин cүрэхтэниитэ

Бу дьоһун үлэни ырытарга учууталлар, уһуйаан үлэһиттэрэ ааҕааччы быһыытынан мустан, сыаналаан санааларын эттилэр.

Конференцийэҕэ Ил Түмэн билим уонна үөрэхтээһин сис кэмитиэтин бэрэссэдээтэлэ Антонина Григорьева кытынна. Кини Галина Семеновнаҕа истиҥ эҕэрдэтин  уонна санаатын тиэртэ:

«Ытыктабыллаах Галина Семеновна уонна манна бүгүн мустубут күндү ыалдьыттар! Ийэ тылбыт, сурукпут-бичикпит күнүнэн Ил Түмэн аатыттан уонна тус бэйэм ааппыттан эҕэрдэлиибин. Билигин биһиги төһө да уустук кэмҥэ олордорбут, төрөөбүт төрүт тылбыт биһиэхэ күүс-көмө буолар. Билиҥҥи кэмҥэ тылбыт сайдарыгар, туттуллар эйгэтэ кэҥииригэр өрөспүүбүлүкэ салалтатын уонна Ил Түмэн депутаттарын өттүттэн улахан ситимнээх үлэ барар.

Бүгүҥҥү национальнай оскуоланы саҥардан, сайыннарыы кэнсиэпсийэтэ олоххо киирэригэр, бу кинигэ сүрэхтэниитин суолтата сүдү. Галина Семеновна 90-сыллартан саҕалаан үөрэх кэнсиэпсийэтэ олоххо киирэригэр Муома улууһугар учууталлаан уонна кэлин университекка биллэр-көстөр учуонай быһыытынан, саха эйгэтин тэрийэргэ, саха толкуйун, майгытын чиҥэтэн уонна дириҥэтэн биэрэргэ сыралаах улахан үлэни үлэлээн кэллэ. Галина Семеновна ыытар үлэтин дьон-сэргэ сэргиир, сэҥээрэр уонна ылынар».

Монографияҕа  Саха сиригэр сахалыы үөрэтии олоххо киирэр хаамыытын, ситиһиилэрин, моһоллорун туораттан кэтээн көрөн буолбакка, ааптар тус бэйэтэ кыттан билбитигэр олоҕурар ырытыыта киирдэ.

2001 сылтан күн бүгүҥҥэ диэри сурукка тиспит, араадьыйанан, сонуну киэҥник тарҕатар эйгэ бары көрүҥүнэн норуокка иһитиннэрэн, биллэрэн испит матырыйаалын сааһылаан уонна кэнсиэпсийэ ааптара Е.П. Жирков 70 сааһын көрсө киэҥ эйгэҕэ таһаарар. Кинигэ үөрэхтээһин эйгэтигэр сыһыаннаах идэлээхтэргэ эрэ буолбакка, ону тэҥэ төрөппүккэ, ааҕааччы киэҥ араҥатыгар эмиэ төһүү күүс буолар аналлаах.

Кинигэ ырытааччылара – п.б.д. Евдокия Михайловна Поликарпова, п.б.д. Федосия Васильевна Габышева, эппиэттиир эрэдээктэрэ п.б.д. Егор Петрович Жирков буолла. Кинигэ бэчээттэммит ахсаана – 500 экз.

***
Ил Түмэн пресс-сулууспата