“Мондурах” сайылыкка 24-с төгүлүн массыынанан ыаһын эпэрээтэрдэрин Өрөспүүбүлүкэтээҕи куонкурус буолан ааста

Бэс ыйын 27-28 күннэригэр Хаҥалас улууһун Иккис Малдьаҕар нэһилиэгин  “Мондурах” сайылыгар 24-с төгүлүн массыынанан ыаһын эпэрээтэрдэрин Өрөспүүбүлүкэтээҕи куонкурустара буолан ааста.

Куонкуруска барыта 10 улуустан 40 ыанньыксыт 11 хамаандаҕа киирэн кыттыыны ыллылар. Ол иһигэр Сунтаартан, Дьааҥыттан, Ньурбаттан, Өлүөхүмэттэн куонкурус кыттааччылара кэлбиттэр.

Кыттааччылар ынаҕы ыаһын маастарыстыбатын көрдөрдүлэр, ону тэҥэ ыыр аппараат оҥоһуутугар уонна хомуйууга күрэхтэстилэр. Куонкурус программатынан кыттааччылар түһүлгэлэрин көрүү, араас көрүҥнээх күрэхтэһиилэр ыытыллыылара тэрээһини өссө сытыырхатта. Онон ыанньыксыттар идэлэринэн эрэ буолбакка спортка дьоҕурдарынан эмиэ холостулар.

Бу куонкурус бочуоттаах ыалдьытынан Үлэ Геройа Михайлов Владимир Африканович буолан киирии тылыгар ыанньыксыттары иһирэх тылынан эҕэрдэлээтэ уонна хас биирдии кыттааччыга ситиһиини баҕаран тыл эттэ.

Өссө биир чаҕылхай бэлиэ түгэнинэн тэрээһиҥҥэ Үлэ бэтэрээнэ Тимофеева Наталья Николаевна кыттыыта буолла. Кини үйэ аҥаара үлэтин тыа хаһаайыстыбатын сайдыытыгар анаабыт. Куонкурус аһыллыыта кини төрөөбүт күнэ сөп түбэһэн куонкурус кыттааччылара Наталья Николаевнаны 83 сааһын туолбут күнүнэн ис сүрэхтэриттэн истиҥник эҕэрдэлээтилэр.

Икки күннээх күрэхтэһии түмүгүнэн жюри быһаарыытынан бастакы миэстэни тэрээһини ыытыы хаһаайыннара “Бөртө сылгы собуота” ХЭТ хамаандата, иккис миэстэни Ньурба уонна үсүһү Амма хамаандалара ыллылар.

«Бөртө сылгы собуота» сүрүн дьарыгынан үүт-эт оҥорон таһааран, астаан-үөллээн Хаҥалас эрэ улууһугар буолбакка Дьокуускай эргин батаран бу тэрилтэ бородууксуйата нэһилиэнньэ ортотугар киэҥник биллэр. Ол да иһин тэрилтэ этэ, үүт оҥоһуга маҕаһыыннарга өр сыппат. Хаһаайыстыба приленскай боруода сылгыны иитиигэ уонна холмогор сүөһүгэ РФ племенной хаһаайыстыбатын быһыытынан үлэлиир. Билигин тэрилтэ «Туймаада» Агрохолдинг АУо биир бастыҥ үлэлээх хаһаайыстыбата.

Куонкурус кыайыылаахтара кылаабынай бирииһинэн «Синтай» тракторынан наҕараадаланан үлэһиттэр үөрүүлэрэ өссө улаатта. Ону тэҥэ Бөртөлөр атырдьах ыйыгар Бүтүн Россияятааҕы ыанньыксыттар куонкурустарыгаркыттан Өрөспүүбүлүкэ чиэһин көмүскүүр быраабы ыллылар.

***
Прокопий ХАБАРОВ