Мииринэй инвестиционнай форумугар Сунтаар улууһуттан 29 киһилээх делегация баран 7 бырайыак кытынна

Бэс ыйын 12-14 күннэригэр Мииринэй куоракка “Западная Якутия – новые возможности” инвестиционнай форум буолан ааста. Форумҥа уопсайа Саха сирин 9 арҕаа улуустара кэлэн кыттыыны ыллылар.

Сунтаар улууһуттан 29 киһилээх делегация баран 7 бырайыак кытынна, олортон ООО “Кемпендяйская солевая компания”, ООО “Сунтаарцеолит”, СППСК “Продукт Якутии”, “Комплексстрой” тэрилтэлэр араас хайысхалаах бырайыактарын билиһиннэрдилэр. Сүрүн туруорсар хайысхабыт Кэмпэндээйи кластерын сайыннарыы, ол эбэтэр чох хостооһуна, цеолиттэн элбэх арааһынай продукцияны оҥоруу уонна туус хостооһунун тэрийэр «Инникитин социально-экономическэй сайдыыга туһааннаах сир» буолар.

Улуус делегацията Бырабыытылыстыба бэрэссэдээтэлин Владимир Солодовы кытары көрсөн цеолит, туус инникилэрин тула кэпсэттилэр уонна улууска кэлиитин сүбэлэстилэр.

Сунтаар улууһун Аҕа баһылыга Анатолий Григорьев уонна предпринимательство миниистирэ Ирина Высоких буолан бииргэ үлэлииргэ меморандум (сөбүлэҥ) түһэристилэр. 

***

“Сунтаар улууhа (оройуона)” муниципальнай оройуон дьаһалтатын пресс – сулууспата