Курс валют
$
73.97
0.92
83.84
0.99
Курс валют
Курс валют
$
73.97
0.92
83.84
0.99
Меню
Поиск по сайту

Мэнэ Ханаласка ыччат нэдиэлэтэ сагаланна

23.11.2020 16:09 0
Мэнэ Ханаласка ыччат нэдиэлэтэ сагаланна

Сэтинньи 23‒29 күннэригэр Мэҥэ Хаҥалас улууһугар үгэскэ кубулуйбут Ыччат нэдиэлэтэ ыытыллар. Быйылгы тэрээһин «Стань частью добра» диэн үтүө санааланыыга сирдиир дэбиистээх барыаҕа.


Бу нэдиэлэ чэрчитинэн Мэҥэ Хаҥалас улууһун ыычатыгар анаан билиҥҥи кэм сиэринэн онлайн-көрсүһүүлэр ыытыллаллар. Ол эбэтэр улуус ыччатын онлайн-дьарыктар, быһа эпиирдэр, квиз-викториналар, үтүө дьыалалар марафоннара, онлайн-куонкурустар о.д.а. күүтэллэр.

Сэтинньи 23 күнүгэр @molodejj_meginokangalasky инстаграм аадырыска Ыччат нэдиэлэтин үөрүүлээх аһыллыыта буолла. Ыччаты кытта быстах кэмҥэ улуус баһылыгын эбээһинэһин толорооччу Мирон Свинобоев, ыччат дьыалатыгар уонна дьиэ кэргэн бэлиитикэтигэр улуустааҕы управление начаалынньыга Ирина Назарова кытыннылар.

Сэтинньи 24 күнүгэр инстаграмҥа өрөспүүбүлүкэтээҕи волонтердар ыстааптарын салайааччы Алена Кычкина уонна «Кыайыы волонтердара» Бүтүн Арассыыйатааҕы хамсааһын Саха сиринээҕи эрэгийиэннээҕи салаатын салайааччыта Алгыс Петров кытталлар. Бу күн ZOOM сыһыарыынан идэни сөптөөхтүк талыыга онлайн-дьарык буолар.

Сэтинньи 25 күнүгэр Мэҥэ Хаҥалас улууһун оҕо хамсааһынын бэрэстэбиитэллэрин, Ил Түмэн  Судаарыстыбаннай мунньах иһинэн Ыччат парламенын бэрэссэдээтэлин Алексей Иннокентьевы кытта инстаграмҥа көрсүөхтэрэ, ZOOM сыһыарыытыгар «Кэрэ аҥар дьоло» диэн олус интэриэһинэй онлайн-дьарык буолар.

Сэтинньи 26 күнүгэр «2020-2024 сс. хаачыстыбалаах дьиэнэн-уотунан хааччыйыы уонна олох-дьаһах коммунальнай өҥөтүн  тупсарыы» диэн тиэмэҕэ быһа эпиир, улуустааҕы дьарыктаах буолуу киинин бэрэстэбиитэлин кытта көрсүһүү былааннанар. Бу киэһэ зуумҥа «Оҕо болҕомтотун хайдах сайыннарабыт» диэн эдэр төрөппүттэргэ аналлаах онлайн-дьарык буолуоҕа.

Сэтинньи 27 күнүгэр СӨ ыччат дьыалатыгар уонна социальнай коммуникацияларга министиэристибэ ыччат бэлиитикэтин отделын исписэлииһэ Анна Гуляеваны кытта муниципальнай тэриллиилэргэ чөл олох ыстаатыһын ылыы туһунан, зуумҥа «Бырааһынньык иннинээҕи сүпсүлгэҥҥэ хайдах оҕустарбакка олоруу» туһунан онлайн-дьарык буолуоҕа. Нэдиэлэ чэрчитинэн Дьоруой сылыгар аналлаах эмблема куонкуруһа, «Үтүөнү бэлэхтээ» үтүө дьыала марафона, «Мин ‒ патриоппун» эссе суруйуутугар куонкурус, «Үтүө дьыала хаартата» көрдөөх оонньуу о.д.а. тэрээһиннэр ыытыллыахтара.

Тэрийээчилэр биир дойдулаахтарын, эдэр дьону Ыччат нэдиэлэтигэр сэргэхсийэ таарыйа көхтөөхтүк кыттаргытыгар, элбэх билиини ылынаргытыгар ыҥыраллар.

Кыттыыны ылыан баҕалаахтар 89148249327, 89142686344 нүөмэрдэргэ эрийэн билсиҥ.

***

Источник: “Эркээйи” хаһыат

Оставить комментарий