Мэҥэ Хаҥаласка социальнай үлэһиттэр холбоһуктарынан күрэхтэһэллэр

Алтынньы 1-10 күнүгэр диэри аҕам саастаахтар дэкээдэлэрин чэрчитинэн Мэҥэ Хаҥалас улууһун нэһилиэнньэ социальнай көмүскэллээх буолуу управлениетын социальнай өҥөнөн хааччыйар салаа сэбиэдиссэйэ Мария Федорова тэрийиитинэн социальнай үлэһиттэр куонкурустара ыытылынна.

Быйылгы куонкурус уратытынан кустовой холбоһуктарынан араарыллан биир бастакынан Майа КМО-та саҕалаата. Барыта 6 холбоһуктарынан тыырыллан, социальнай үлэһиттэр бэйэлэрэ дьиэҕэ көрөр дьонноругар анаан тэрээһиннэри ыытыахтаахтар. Алтынньы 8 күнүгэр СӨ дьиэ кэргэни уонна ыччаты өйүүр социальнай-психологическай кииҥҥэ Майа КМО-тун социальнай үлэһиттэрэ Тыыллыматтан Марианна Роббек, Хараттан Лидия Петрова, Майаттан Анастасия Алексеева, Саргылана Посельская, Марфа Титова, Артур Босиков кыттыыны ыллылар.

Куонкурус доруобуйа тиэмэтигэр сөп түбэһиннэрэн барда, ыалдьыттар Дьокуускайтан доруобуйаны, чөл олоҕу тарҕатар түмсүүттэн Сильвия Сыромятникова уонна Альбина Винокурова доруобуйа туһунан хамсаныылаах эрчиллиилэри көрдөрөн, туһалаах сүбэлэри биэрэн аҕам саастаахтары сэргэхситтилэр.

Социальнай үлэһит Анастасия Алексеева авторскай бырайыагынан дөлүһүөн утаҕынан кэлбит дьону күндүлээтэ. Куонкурус дьүүллүүр сүбэтигэр нэһилиэнньэ социальнай көмүскэллээх буолуутун управлениетын салайааччытын солбуйааччыта Александр Игнатьев, улуус кылаабынай бырааһын солбуйааччыта Люция Матчитова, Майа сэлиэнньэтин дьаһалтатын исписэлииһэ Октябрина Кулешова, үһүс көлүөнэ оскуолатын салайааччыта Людмила Стручкова-Заровняева, СӨ дьиэ кэргэни уонна ыччаты өйүүр социальнай-психологическай киин социальнай педагога Зоя Герасимова үлэлээтилэр. Бу тэрээһиҥҥэ кыттыбыт аҕам саастаахтар үөлээннээхтэрин кытары ирэ-хоро кэпсэтэн, сэргэхсийэн тарҕастылар.

***

Ааптар: Зоя ГЕРАСИМОВА.