Мэҥэ Хаҥалас улууһун хоккеистара хаҥкы кордун бэлэмнээтилэр

Манчаары” хоккей кулуубун салайааччыта Алексей Неустроев соторутааҕыта хамаандаҕа анаан ааттара, логотиптара тигиллибит бэртээхэй анал кууркаламмыттарын туһунан эппитэ. Ыччаттар бу бэлиэлэри санаатын ууран  туран оҥорон биэрбит Дорҕоон Дохсуҥҥа махталларын тиэрдэллэр.

Аны бэҕэһээ Майа киинигэр баар хаҥкылыыр куорду ыраастаан, дьон-аймах сылдьарыгар анаан бэлэмнээтилэр. Бу – икки нэдиэлэлээх үлэ түмүгэ.

— Киэһээттэн киэһээ хамаандам уолаттарын кытта мустан, хоккейнай кортпутугар уу кутан, мууспутун үүннэрэн, 15 см курдук халыҥнаах оҥордубут. Маны Майабыт олохтоохторо, кырачааннара эт-хаан өттүнэн чэбдигирдиннэр диэн биир санаанан күүскэ үлэлээтибит. Хаарын ыраастааһыҥҥа олохтоох дьаһалтабыт, “Бачыым” чааһынай тэрилтэ күүс-көмө буоллулар. Бүтэһик түһүмэҕинэн сылаанганан кутуллубут мууһу итии уунан өтүүктээтибит, – диир Алексей Иннокентьевич.

Күүтүүлээх сааскы сырдык күннэри үөрэ-көтө, сибиэһэй салгынынан сайа тыынан ыччаттар, оҕо-аймах мустан хаҥкылаан дайыахтара.

***

Виктория Белолюбская