Мэҥэ Хаҥалас төрүттэммит күнүгэр академик Ларионовы ахтан-санаан ааһаллар

В.П.Ларионов аатынан Майа орто оскуолатыгар академик Владимир Петрович Ларионов төрөөбүтэ 83 сылыгар, Мэҥэ Хаҥалас улууһун төрүттэммит күнүгэр, итиэннэ судаарыстыбаннай-бэлитиическэй деятель Матвей Васильевич Мучин 80 сааһыгар аналлаах миитин ыытылынна.

Бүгүн, олунньу 10 күнүгэр, үтүө-мааны үлэһит дьонноох, батталы утары туруммут Манчаары дьоруойдаах, олоҥхоҕо хоһуйуллар кэрэ айылҕалаах Мэҥэ Хаҥалас улууһун төрүттэммитэ 91 сыла. Бу бэлиэ күҥҥэ сахаттан бастакы академик, техническэй наука доктора, уһулуччулаах учуонай Владимир Петрович Ларионов Мэҥэ Хаҥалас улууһун I Тыыллыма нэһилиэгэр күн сирин көрбүтэ.

Төрөөбүт дойдутун сайдыытын, кэскиллээх инникитин туһугар олоҕун анаабыт, саха норуотун чулуу учуонайа уонна науканы тэрийээччитэ Владимир Петрович Ларионов баараҕай байҕал кэриэтэ дириҥ ис хоһоонноох олоҕор төһүү күүс кэрдииһинэн үөрэммит оскуолата буолар. Академик аатын сүгэр оскуола үөрэнээччилэрэ Владимир Петрович үөрэммит оскуолатыгар үөрэнэллэринэн киэн тутталлар, кини аатын ытыктыыллар, сүгүрүйэллэр! Сыллата Владимир Петрович төрөөбүт, улуус тэриллибит күнүн улахан суолта ууран, киэҥ хабааннаахтык бэлиэтиибит. Академик аатын үйэтитэн, ытыктыыр киһибит мэҥэ тааһын иннигэр миитин ыытан, сибэкки дьөрбөтүн, венок уурабыт.

Быйылгы миитин ыҥырыылаах ыалдьыттарынан Мэнэ Ханалас улууһун баһылыгын маҥнайгы солбуйааччыта Семен Потапов, Майа сэлиэнньэтин баһылыга Дмитрий Тихонов уонна Мэҥэ Хаҥалас улууһун «Ытык сүбэ» общественнай түмсүүтүн бэрэссэдээтэлэ Василий Эверстов буоллулар. Ытыктабыллаах ыалдьыттар Өрөспүүбүлүкэ Автономиятын төрүттэспит, М.К.Аммосовы кытта Өрөбөлүүссүйэ Улуу сирдьитэ В.И.Ленини көрсүбүт К.О.Гаврилов, Саха сирин 13 сыл устата бастакы сирэй быһыытынан салайбыт С.З.Борисов, сахалартан бастакы Сэбиэскэй Сойуус Геройа, 100 сылын бэлиэтиир Баатара ыччата Ф.К.Попов, бастакы Социалистическай Үлэ Геройун сылгыһыт А.Е.Степанов, академик  В.П.Ларионов, итиэннэ, билигин биһиги ортобутугар үлэлии-хамсыы сылдьар судаарыстыбаннай уонна бэлитиичэскэй диэйэтэл М.В. Мучин холобур буолар олохторун ахтан-санаан туран, эҕэрдэлэрин тиэртилэр.

Владимир Петрович Ларионов оскуолаҕа үөрэнэр сылларыгар туйгун үөрэхтээҕин, эҥкилэ суох бэрээдэктээҕин, билиигэ ураты дьулуурдааҕын бииргэ үөрэммит доҕотторун уонна учууталларын ахтыылара кэрэһэлииллэр. Кини Майа орто оскуолатын кыһыл көмүс мэтээлинэн бүтэрбитэ. Владимир Петрович Ларионов аатын сүгэр оскуола үөрэнээччилэрэ, академик үтүө холобурунан, туйгуннук үөрэнэргэ, научнай-чинчийэр үлэнэн дьарыктанарга дьулуһаллар. Сыллата, үгэс быһыытынан, Владимир Петрович төрөөбүт күнүгэр сөп түбэһиннэрэн, оскуола туйгун үөрэнээччилэрин «Володя Ларионов галереятыгар» киллэрии тэрээһинэ үөрүүлээх быһыыга-майгыга ыытыллар.

Быйыл галереяҕа 109 туйгун үөрэнээччи киирдэ. Кинилэр ааттара «Володя Ларионов дневнигэр» суруллан, оскуола музейыгар өйдөбүнньүк буолан ууруллар.

Наука кирилиэһин бары үктэлин эрэллээхтик дабайан, академик буола үүммүт, киэн туттар киһибит Владимир Петрович Ларионов аата суолдьут сулус буолан кэнчээри ыччаты үрдүккэ, сырдыкка ыҥыра-угуйа, сирдии туруохтун!

***

Изабелла Романова