МЭҤЭ ХАҤАЛАС ТИЭЛИГИТИГЭР ОЙУУР БАҺААРЫН УМУЛЛАРЫЫГА ОЛОХТООХТОР ТУОРА ТУРБАТЫЛАР

Мэҥэ Хаҥалас Тиэлигитигэр Амма оройуонун кытта быысаһар отучча биэрэстэлээх сиргэ ойуур баһаарын төгүрүтүү атырдьах ыйын 4 күнүгэр түмүктэммит. Дьокуускайдааҕы авиабаза үлэһиттэрэ ойуурга уот букатыннаахтык бохсуллубутун туһунан бу күннэргэ иһитиннэриэхтээхтэр.

— Хас эмэ сүүһүнэн гектардаах тайҕаҕа ойуур баһаарын умулларыыга авиабаза үлэһиттэригэр олохтоох дьон  эмиэ күүстэрин холбоон үлэлэстилэр, — диэн иһитиннэрэр 1-кы Наахара нэһилиэгин баһылыга Алексей Григорьев. Афанасий Кириллин салайааччылаах добровольнай баһаарынай хамаанда үлэлэспит. Олохтоохтортон Владимир Макаров, Владимир Алексеев, Александр Потапов, Иван Егоров, Александр Игнатьев, Гаврил Федоров, Михаил Денисов, дьаһалта суоппара Иван Сивцев, лесник Валерий Кириллин күүс-көмө буолбуттар, сорохтор чааһынай тиэхиньикэлэрин туһаннылар. Олохтоох дьаһалта уматыгынан хааччыйбыт.

Тиэлигилэр Мэҥэ Хаҥаластааҕы ойуур хаһаайыстыбата (салайааччы Алексей Тимофеев) уонна улуустааҕы биир кэлим диспетчерскэй сулууспа (начаалынньык Егор Матчитов) кытта сибээһи тутуһан, балаһыанньаны биллэрэ олорбуттар. Бөһүөлэктэн ойуур баһаара отучча биэрэстэ ыраах буолан улахан куттал суоһаабатах. Ол да буоллар, дьону, сүөһүнү көһөрүүгэ бэлэмнэммиттэр.

Баһаартан Араҥас ходуһатыгар Гаврил Федоров икки кэбиһиилээх ото уокка былдьаммыт, атын отторун быыһаан тиэйбиттэр. Айылҕа хоромньутугар аакта толоруллубут.

***

Ааптар: Марфа ПТИЦЫНА