Мэҥэ Хаҥаласка өссө биир сайылык сөргүтүллэн үлэҕэ киирдэ
Бүгүн, ыам ыйын 22 күнүгэр Мэҥэ Хаҥалас улууһун Тараҕай нэһилиэгин Лампа сайылыгар улууспут туруу үлэһит дьоно-сэргэтэ, ытыктабыллаах бэтэрээннэрбит, самаан сайыны көрсө Сайылык күнүгэр түмүстүлэр. Бу үөрүүлээх түгэҥҥэ норуот дьокутааттара Александр Атласов уонна Андрей Находкин кыттыыны ыллылар.
СӨ Бырабыыталыстыбатын бэрэссэдээтэлин солбуйааччы Сергей Местников, улуус баһылыга Дмитрий Тихонов, оройуон дьокутааттарын Сэбиэтин бэрэссэдээтэлэ Иннокентий Андросов, Ил Түмэн Судаарыстыбаннай мунньах Сир сыһыаннаһыыларыгар, айылҕа баайыгар уонна экологияҕа сис кэмитиэтин бэрэссэдээтэлэ Андрей Находкин, тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Александр Атласов, Тараҕай нэһилиэгин баһылыга Юрий Порядин, тыа хаһаайыстыбатын салалтатын салайааччыта Иннокентий Семенов, «Араҥас» тыа хаһаайыстыбатын кэпэрэтиибин бэрэссэдээтэлэ Роман Герасимов үтүө үлэһит дьоммутугар бэриниилээх, сыралаах үлэлэригэр махтанан туран эҕэрдэ тылларын эттилэр, наҕараадалары туттардылар.
Бэлиэ күн Лампа сайылыгар Роман Романович Герасимов салайааччылаах «Араҥас» тыа хаһаайыстыбатын кэпэрэтиибин саҥа титиигэ, үлэһиттэр олорор дьиэлэрэ үөрүүлээх быһыыга арылынна.
Улуус баһылыга Дмитрий Тихонов тэрээһиннээх хаһаайыстыбалар сайылыктарын чөллөрүгэр түһэрэргэ улууспутугар үс сыллаах Тыа хаһаайыстыбатын сылларынан анал тосхол олохтоон, бу сылга 1 мөлүйүөн солкуобай суумалаах туоһу суругу үөрүүлээх быһыыга Мэҥэ нэһилиэгин Маргарита Скрябина салайааччылаах «Хаххах» тыа хаһаайыстыбатын кэпэрэтиибэр туттарда.
Бу күн үтүө үлэһит дьоммут күннээҕи түбүктэн аралдьыйан, ирэ-хоро кэпсэтэн, күрэхтэргэ кыттан, айылҕалыын алтыһан, үөрэн-көтөн, астынан тарҕастылар.
***
Мэҥэ Хаҥалас улууһун дьаһалтатын пресс-сулууспата
Оставить комментарий