Билигин киһи барыта төлөпүөнүн илиититтэн араарбатын кэриэтэ. Ол эмиэ сөп курдук. Билиҥҥи сыыппара үйэтигэр бу кыра төлөпүөнүҥ иһигэр эн олоҕуҥ укулаата үксэ да харайылла сылдьар.
Ол курдук, банковскай каарталарыҥ, «Мои документы» сыһыарыыҥ, аны уотуҥ, кыбартыыраҥ төлөбүрдэрэ, үгүстүк эрэйдиир интэриниэтиҥ иһин төлөбүргүн умнума диэн биллэрии кэлэрэ… Дьэ, бу курдук ааҕан сиппэккин. Аны туран, үлэҥ сорҕото эмиэ төлөпүөнүҥ иһигэр баар. Онон хайдах да бу тэрилбитин күн да аҥаара туора уурар кыахпыт суох курдук. Аны субуон үөһэ субуон бөҕө буолабыт, киһи сылдьарын тухары наадата, этэрэ, кэпсэтэрэ бүппэт буоллаҕа. Ол быыһыгар түөкүттэр сылаталлар. «Түөкүттэр субуоннууллар» диэн бары дьаахханан билбэт нүөмэрбитин ылбат буолабыт, ол эрээри син биир хайдах эрэ мүччү туттаран кэпсэппиппитин өйдөөбөккө хаалабыт ээ. Ол эрээри билигин киһи үксэ манна сэрэхтээх буолары өйдөөтө.
Аны туран, бу массыанньыктарбыт биһиги бэйэлээх бэйэбит харчылаах картабытыгар өтөн киирэр буоллулар. Ол хайдах диэтэххэ маннык. Эн картаҕар төһө да харчы кэлэн түһэрэ чугастааҕы кэминэн суоҕун үрдүнэн биир кэмҥэ харчы кэлэн түстэ. Ону биһиги улаханнык баардыылаабакка ылан туттан кэбиһиэхпитин эмиэ сөп. Эбэтэр ол ыыппыт киһи төлөпүөннээн маннык нүөмэргэ ити харчыны ыыт, алҕас эһиэхэ барбыт диэхтэрин сөп. Ону ыламмыт истигэн дьон, чахчы да мин харчым буолбатах, өссө «барахсан ыксыы сылдьан атын сыыппараны сыыһа көрөн миэхэ ыыппыт» диэн ол киһини аһына саныы түһээт, түргэн үлүгэрдик ол эппит нүөмэрдэригэр харчыны ыытан кэбиһэбит. Бу кэннэ аны бэйэҥ картаҥ харчыта чарааһаан барыан сөп. Ол аата эн массыанньыктарга түбэстэҕиҥ ити баар.
Онон, сэрэхпитин сүтэрбэппит. Итинник балаһыанньаҕа түбэстэххитинэ бааҥҥа эрийэн этиҥ, миэхэ маннык харчы кэлэн түстэ, ол туох харчыта буоларын быһаарсыҥ диэн биллэрэ охсоруҥ бэйэҕэр абырал. Туһааннаах баан эн сэрэтиигинэн, биллэриигинэн үлэлэһэн билиэхтэрэ, тугун-ханныгын. Аны ол эйиэхэ кэлбит харчыны бэйэҥ төттөрү ыыппаккын, баан нөҥүө оҥоһуллар. Маны өйдөөҥ.
Аны ол «харчы алҕаска эйиэхэ барбыт» диэн эриһэр дьоҥҥут эйигин куттаан, сантаастаан барыахтарын эмиэ сөп. Онтон куттанан эмиэ харчыны этэр нүөмэрдэригэр ыытарга күһэллиэххин сөп. Ону олох толорумаҥ. Ити үөһэ этэн ааспыппыт курдук, туһааннаах бааҥҥа баран билсиҥ.
Биллибэт дьонтон картаҕа харчы кэлэн түстэҕинэ, олох туттумаҥ, төлөпүөн нөҥүө этэр модьуйууларын толорумаҥ, тутатына бааҥҥа барыҥ диэн кырдьаҕас дьоҥҥутун сэрэтэ, үөрэтэ сылдьыҥ. Кистэл буолбатах, бэл үөрэхтээх, барыны бары сатыыр, билэр эдэр дьон манныкка түбэһэллэр ээ. Онон бука бары сэрэхпитин, чуҥмутун сүтэримиэҕиҥ. Массыанньык угаайытыгар киирэн биэримиэҕиҥ.
Яина ВЛАСЬЕВА
Оставить комментарий