Курс валют
$
63.57
0.01
70.46
0.07
Курс валют
Курс валют
$
63.57
0.01
70.46
0.07
Меню
Поиск по сайту

Кутана нэһилиэгэр саҥа 100 төбө турар хотонун тутуута саҕаламмыт

31.07.2019 10:58 0
Кутана нэһилиэгэр саҥа 100 төбө турар хотонун тутуута саҕаламмыт

От ыйын 30 күнүгэр Улуус Аҕа баһылыга Анатолий Григорьев уонна тыа хаһаайыстыбатын салайааччыта Иван Тихонов буолан Түбэй-Дьаархан уонна Кутана нэһилиэктэрин оттуур ходуһаларын, ыһыы бурдук бааһыналарын, үлэһиттэри көрсөн оттооһун үлэтин билистилэр.

Сунтаар улууһа быйыл окко былаана 34000 туонна. Онтон сиилэскэ 3000 туонна, сенажка 120 тн былааннаахтар. Күн-дьыл туран биэрэн, дьон ходуһаҕа маассабайдык от ыйын ортотуттан киирдэ. Быйыл от үүнүүтэ үчүгэй. Онон былаан туолуо диэн эрэллээхтэр.

Саха киһитэ сайыҥҥы ыйдарга оту – быйаҥы – сомсон ыларга тиэтэйэр. Ол курдук Түбэй-Дьаархан нэһилиэгэр, крестьянскай фермерскай хаһаайыстыбалаах Михаил Комин 50 га сири нүөлсүтэн кормовой культура ыспыт. Хаһаайын «Арыылаах» диэн оттуур ходуһата өлгөмнүк үүммүтүн бэлиэтиир, былырыын 150 туонна от ылбыт буоллахтарына быйылгы былаанынан 350 туонна от кэлиэ диэн сабаҕалаан этэр.

Нэһилиэк баһылыгын солбуйааччы Любовь Тихонова уонна тыа хаһаайыстыбатын исписэлииһэ Наталья Иванова оттуур ходуһаларга 2 килэмиэтир күрүө оҥоһуллубутун, салгыы 14 килэмиэтир күрүөлээһиҥҥэ үлэ былааннаммытын билиһиннэрдилэр.

Кутана нэһилиэгэр Яков Егоров бэрэсэдээтэллээх «Сомоҕо» кооператив быйылгы кыстыкка үлэҕэ киириэхтээх, саҥа 100 төбө турар хотонун тутуута саҕаламмыт. Манна Данил Федоров салайааччылаах СХПК “Күүкэй” көмөлөһөр, от үлэтэ үмүрүйдэҕинэ хотон тутуутун ситэрэр былааннаахтар.

Нэһилиэк баһылыга Николай Давыдов, оттуур ходуһаларга уйгуну-быйаҥы сомсон оттооһун үлэтэ тэтимнээхтик салҕанарын бэлиэтиир. От кэннэ, бары күүһү ходуһалары күрүөлээһиҥҥэ ууруохпут диэн бигэргэтэр.

***

«Сунтаар улууhа (оройуона)» муниципальнай оройуон дьаһалтатын пресс – сулууспата

Оставить комментарий    

!