Куокунуга тыа хаһаайыстыбатынан дьарыктаныы

Атырдьах ыйын 27 күнүгэр, тыа хаһаайыстыбатын управлениетын салайааччыта Владимир Анисимов уонна сүрүн исписсэлиис Антонина Кириллина Куокуну нэһилиэгэр сырыттылар.

Куокуну нэһилиэгэр баһылык Леонид Михалев, оскуола директора Николай Иванов уонна оскуола производственнай үөрэтии маастара Максим Павлов хаппыыста үүннэрбит сиргэ сырытыннардылар. Быйыл “Золотой гектар” уонна саҥа көрүҥ “Ринда” олордубуттар. Билигин үүммүт оҕуруот аһын түргэнник нэһилиэнньэҕэ батарыыга уонна үрдүгэр астаан оҥорон таһаарыы боппуруоһа турар.

Салгыы крестьянскай фермерскай хаһаайыстыбалаах Радислав Попов хотонугар сылдьыы буолла. 27 ынах төрөөбүтүн ыан туттара тураллар. Ходуһалар оттонон бүппүттэр, быйыл кураан дьыл буолан от үүнүүтэ мөлтөх, хаһаайын кыстыгы туоруур от саппааһа тийбэтин кэпсиир.

***

“Сунтаар улууhа (оройуона)” муниципальнай оройуон дьаһалтатын пресс – сулууспата