Кэлэр 2027 сылга биэнсийэ бары көрүҥэ үрдүөҕэ

Арассыыйаҕа 2027 сылга биэнсийэ бары көрүҥэ — страховой, социальнай уонна байыаннай — үрдүүрэ күүтүллэр. Бу туһунан эспиэр Татьяна Подольская этиитигэр олоҕуран, РИА Новости иһитиннэрэр.

Эспиэрдэр бэлиэтииллэринэн, билигин дааннайдар быһа барыллаан ааҕыллыбыттар. Ол курдук, үрдээһин хас да түһүмэҕинэн барыаҕа:

Страховой биэнсийэлэр (саастарынан, инбэлииттэринэн уонна иитээччитин сүтэрбиттэргэ)

• Олунньу 1 күнүттэн: 6,8% үрдүөҕэ. Бу көрдөрүү 2026 сыллааҕы дьиҥнээх инфляция таһымыгар олоҕуран ааҕыллар.
• Муус устар 1 күнүттэн: эбии 3,3% үрдүөҕэ (үрдээһин иккис түһүмэҕэ).

Үлэлиир биэнсийэлээхтэргэ уонна мунньуллар биэнсийэ

• Атырдьах ыйыттан: Үлэлиир биэнсийэлээхтэр харчылара хаттаан ааҕыллан үрдүөҕэ. Ону тэҥэ, инвестицияттан киирбит дохуоттан көрөн, мунньуллар биэнсийэ кээмэйэ эмиэ улаатыаҕа.

Социальнай уонна байыаннай биэнсийэлэр

• Муус устар 1 күнүттэн: Социальнай биэнсийэ быһа барыллаан 6,8% үрдүөҕэ.
• Алтынньы 1 күнүттэн: Байыаннай биэнсийэ 4% эбиллиэҕэ (бу байыаннай сулууспалаахтар хамнастара үрдүүрүн кытта ситимнээх).

50 тыһыынчаҕа тиэрдэр этии киирдэ

Маны таһынан, «Парламентская газета» иһитиннэрэринэн, Судаарыстыбаннай Дуумаҕа саҥа сокуон барыла киирбит. Ол сокуоҥҥа үлэлээбэт биэнсийэлээхтэр саамай кыра хааччыллыыларын ыйга 50 тыһыынча солкуобайга тиэрдэр туһунан этии көрүллэр.

***

Ааптар: Василий Прокопьев

Хаартыска: ЯСИА, Мария Васильева