Күрэс тыла сахалыы буолуохтун!

Бырабыыталыстыба иһинэн С.В. Местников салайааччылаах тыл тиэрминин бөлөҕө тэриллэн үлэлиир. Бэрт кылгас кэм иһигэр элбэх тыл ырытыллан, дьүүллэһиллэн, билигин спорт диэн оннугар – күрэс, сахалыы, эбэтэр хотугулуу многоборье диэн оннугар – дэгит күрэс, волонтёр – үтүө көмөһүт о.д.а. тыллары номнуо суруналыыстар уонна күрэс түһүлгэтин кэпсээн ыытааччылар бэйэлэрин суруйууларыгар уонна тылларыгар туттар буолбуттара кэрэхсэбиллээх.

Оттон даҕаны атын, тылбаастаммыт тыллар үчүгэйдик имитиллэн, күннээҕи туттууга киирэн иһиэхтэрэ диэн бүк эрэллээхпит.

Былырыын Тааттаҕа, Манчаары оонньуутун чэрчитинэн спорт тиэрминнэрин сахалытытыы туһунан көрсүһүү тэриллибитэ. Оонньуу бас дьүүлдьүтэ (сүрүн судьуйата) Николай Цыпандин, күрэхтэһии үөрүүлээх аһыллыытыгар үгэс быһыытынан оҥоһуллар дьүүлдьүт андаҕарын урукку курдук нууччалыы буолбакка, сахалыы гыныахха диэн этиитэ биһирэбили ылбыта. Санаа атастаһыытын түмүгүнэн, Саха сирин үтүөлээх суруналыыһа Владислав Коротов, иһитиннэрэр-биллэрэр эйгэ үлэһиттэригэр көмө быһыытынан күрэс сахалыы тылдьытын оҥорон, туһааннаах дьоҥҥо тарҕаппыта. Ону суруналыыстар, айар үлэнэн дьарыктанар дьон бэйэлэрин айымньыларыгар туһаналларыгар, киэҥник тарҕанарыгар көмөлөһөллөрүгэр баҕарыллар.

Аны, күрэс сахалыы көрүҥнэригэр Манчаары аатынан «Модун» өрөспүүбүлүкэтээҕи киинин салайааччыта, Ил Түмэн дьокутаата Геннадий Васильев бэйэтин тэрилтэтин иһигэр урут нууччалыы суруллан турбут анал хостор ааттарын сахалыы тылбаастаах оҥоттордо.

Холобур, раздевалка – таҥнар хос, туалет – чэпчэ, выход – тахсыы… Бу – бэйэбит тылбытын сайыннарыыга, омук быһыытынан уратыбытын көрдөрүүгэ үтүө холобурдарынан буолаллар. Ол батыһааччылаах буоларыгар баҕарабыт.

Күрэс тыла сахалыы буолуохтун!

Нууччалыы-сахалыы күрэс тылдьыта

Абсолютнай чемпион – муҥутуур кыайыылаах

Бокс – буокса

Ветеран – бэтэрээн

Кылаабынай судьуйа – бас судьуйа

ДЮСШ – оҕо-ыччат күрэһин кыһата

Жим – анньыы

Лидер – тумус киһи

Прессинг – ыгыы

Прием – албас

Программа – тускул

Проект – барыл

Профессионал – идэтийбит

Пьедестал – үрдэл

Результат – түмүк, көрдөрүү

Свисток – чуһуурба

Спорт – Успуорт, күрэс

Спортсмен – күрэсчит

Эстафета – түһүмэхтээх сүүрүү

Этап – түһүмэх

Туше – ыраас кыайыы

Апперкот – баһан охсуу

Нокдаун – туймаардыы.

Бу, билиҥҥи кэмҥэ сурукка-бичиккэ да, күрэс хаамыытын көрдөрөн сырдатааччыларга да элбэхтик туттуллар нууччалыы тыллар тылбаастара. Кытаатан, төрөөбүт тылгытынан, сахалыы табатык, сөптөөхтүк саҥара үөрэниҥ!

***
Петр ПАВЛОВ