Курс валют
$
63.78
2.01
65.79
2.99
Курс валют
Курс валют
$
63.78
2.01
65.79
2.99
Меню
Поиск по сайту

ИННИБИТИГЭР ЭЛБЭХ СОРУКТАР ТУРАЛЛАР

19.04.2022 (4 недели назад) 22:11 0
ИННИБИТИГЭР ЭЛБЭХ СОРУКТАР ТУРАЛЛАР

Төһө да ааспыт уонна ол иннинээҕи сыллар уустуктардаах буолбуттарын иһин “Туймаада Агрохолдинг” АУо хаһаайыстыбалара сыллааҕы соруктарын толорон куһаҕана суох түмүктэри ситиспиттэр.

Манна улахан оруолу тустаах хаһаайыстыбалар үлэлэрин тэрээһинин сөптөөх хайысханан тутуһуннаран ыытыылара, ону тэрийиигэ агрохолдинг кэмигэр көмө оҥоруута ылбыта саарбаҕа суох. Агрохолдинг сүөһү иитиитинэн дьарыктанар хаһаайыстыбаларыттан “Туймаада Экоферма” ХЭТ ааспыт сылга туруоруллубут соруктарын толорон түмүктээбит.

Бу хаһаайыстыбаҕа тохсунньу бастакы күнүнээҕи туругунан 1088 ынах сүөһү, ол иһиттэн 625 ыанар ынах баара биллэр. Ааспыт сылга уопсайа 463 төрүөх ылыллыбыт. 2021 сыл устата уопсайа 1429т үүт ыаммыт. Ол аата былаан 104% туолбут. Ол иннинээҕи сылларга, холобур 2019 сыллаахха 905т, онтон 2020 сыллаахха 1300т үүт ыаммытын ылан көрдөххө үүт ыама үрдээн иһэрэ көстөр. Биир ынахтан үүтү ылыы эмиэ үрдээн иһэр эбит. Ол курдук 2020 сыллаахха биир ынахтан 2876 киилэ үүт ыаммыт буоллаҕына 2021 сыллаахха биир ыанар ынахтан 3405 киилэ үүт ыаммыт. Онон биир ынахтан үүтү ыаһын 18,3% улааппыт. Ити көрдөрүүлэри ситиһии сүөһү аһылыгар сүмэһиннээх аһылык ылар ирээтин улаатыннарыы уонна үрдүк хаачыстыбалаах комбикорманан аһатыы буолбут. Бу сылга үктэнэн баран үлэ хаамыытын туһунан “Туймаада Экоферма” ХЭТ дириэктэрэ Егор Егоров  бу курдук иһитиннэрэр:

“Кулун тутар бастакы күнүнээҕи туругунан тэрилтэ үрдүнэн сүөһүбүт ахсаана 1107 төбөҕө тэҥнэстэ. Ол иһиттэн 536 ийэ сүөһү. Төрүөх да куһаҕана суох. Бу сылга үктэнэн баран 134 ынах төрөөн турар. Ол аата сыллааҕы былаан 27,9% туолан турар. Былырыыҥҥыны кытта тэҥнээтэххэ быйыл 24 төбөнөн элбэх. Ити кулун тутар бастакы күнүнээҕи туругунан. Билигин ынахтар төрүү тураллар. Онон ити чахчылар балайда уларыйдылар. Онтон үүккэ тохтуур буоллахха сыл саҕаланыаҕыттан 430 туонна үүт ыанна. Былырыын баччаларга 400 туонна үүт ыаммыта. Онон үүт ыамыгар үрдээһин баар. Атыыга 326 туоннаны туттардыбыт. Үүтү сүрүннээн Дьокуускайдааҕы үүт собуотугар уонна “Туймаада” производственнай комбинатыгар туттарабыт. Уопсайынан бу сылга 1500 туонна үүт туттарар былааннаахпыт. Ол аата былааммыт 28,6% туолан иһэр”.

Ааспыт сайын республикаҕа курааннаан уонна уот туран сүөһү аһылыгын бэлэмнээһиҥҥэ бары хаһаайыстыбалар элбэх уустуктары көрсүбүттэрэ. Бу да тэрилтэҕэ ол охсуута биллибитэ. Ол эрээри агрохолдинг тэрилтэ сүөһү аһылыгын бэлэмнээһинигэр уонна комбикорманы атыылаһыыга өйөбүл оҥорон кыстыгы туоруур аһылыгынан хааччыллар кыахтаммыт.

Ол түмүгэр биһиги хаһаайыстыбаларбытыгар сүөһүгэ көрүллүбүт аһылыгы күһүҥҥэттэн толору биэрэр кыахтаммыппыт. Бүгүҥҥү туругунан 40-н тахса туонна сиилэстээхпит, 17 туонна сенажтаахпыт. Онон сүөһүлэрбит сайын күөххэ үктэниэхтэригэр диэри күөх иҥэмтиэлээх аһылыгы сиир кыахтаахтар.

Республикаҕа хаһаайыстыбалар улаатан, кыанар хаһаайыстыбалар сүөһүлэрин элбэтэн саҥа хотон тутан, сороҕун өрөмүөннээн хаҥыы туралларын хааччыйар сыаллаах бэрт үчүгэй тустаах программалар үлэлээн эрэллэр.Туймаада Экоферма ити программаларга киирэн хотоннорун өрөмүөннүүр былааннаах.

Быйыл Мархатааҕы отделениебытыгар иккис корпуһу бүтүннүү реконструкциялыахтаахпыт, ынах төрүүр корпуһун уонна кормоцеҕы чөлүгэр түһэрэн үлэҕэ киллэриэхтээхпит. Билигин чинчийии үлэтэ бара турар. Ол бүттэҕинэ ити этиллибит үлэлэр саҕаланыахтара.             Икки сыллааҕыта Мархаҕа баар отделенияҕа Красноярскайтан 58 хара эриэн боруода сүөһү аҕалбыппыт. Бу сүөһүлэр үүттээхтэрэ билиннэ. Ааспыт сыл түмүгүнэн бу боруода сүөһүттэн биир ынахтан ортотунан 4800 киилэ үүт ыабыппыт. Быйыл эмиэ Красноярскай кыраайтан 200 итинник боруода сүөһү аҕалыллыаҕа. Билигин 100 сүөһүнү аҕалыыга кэпсэтиһии ыыттыбыт. Дьэ ити сүөһүлэр аҕалыллан корпустар өрөмүөннэнэн үлэҕэ киирдэхтэринэ хотоннорго икки отделениенан барыта 971 сүөһү кыстыкка киириэхтээх. Былаан быһыытынан онтон 70%-на ыанар ынах буолуоҕа. Ону кыстатарга 3000 т от, 3429 т. сиилэс, 303 т сенаж наада буолара ирдэнэр. Итини ситиһэр сыалтан Нөмүгүтээҕи уонна Мархатааҕы отделениеларынан 941 гектар сиргэ ыһыы үлэтэ ыытыллыаҕа. Онтон 447-тэ Мархаҕа, 500 гектар курдуга Нөмүгүгэ баар. Бу кэнники сылларга министиэристибэ тустаах программаларыгар киирэн 500-н тахса гектар бааһынаны чөлүгэр түһэрбиппит, ону таһынан 7,5 км усталаах күрүө туппуппут. Былаан улахан. Үлэ элбэх

“Туймаада Агрохолдинг” хаһаайыстыбалара ыччат сүөһүнү нэһилиэнньэ дохуоттанарын ситиһэр сыаллаах уотууга уонна ииттэригэр биэрэр бэрт үчүгэй программанан үлэлээбитэ хаһыс да сыла. “Туймаада Экоферма” ХЭТ бу программаҕа киирэн быйыл ыччат сүөһүнү нэһилиэнньэҕэ уотууга биэрэр былааннаах.

“Бу сылга биһиги хаһаайыстыба 400-тэн тахса тарбыйаҕы уотууга уонна иитиигэ диэн анал программанан бэлэмнээн турабыт. Билиҥҥитэ улуустары, биирдиилээн хаһаайыстыбалары, дьону да кытта кэпсэтиһиилэр баран тураллар. Биллэн турар хотонноох, сирдээх-уоттаах дьон сүөһүнү сөбүлэҥ быһыытынан ылара ордук. Тоҕо диэтэххэ ыччат сүөһүнү уотууга 1,5 сылга биэрэбит. Ол курдук  ыам ыйыгар иитэ ылбыт ньирэйи кыстатан, эһиил алтынньы ыйга диэри көрөн-харайан баран  ыйааһыннанан тутуллар. Иитиигэ ылбыт дьон уонна агрохолдинг икки ардыгар сөбүлэҥ былырыыҥҥыттан уратыта диэн өлүүскэ 60 %-на сүөһүнү ииппит киһиэхэ хаалар. 40 %-нын агрохолдинг ылар. Аны төлөһүтүү иһин анал төлөбүр көрүллэр. Холобур ньирэйи 300-тэн 350 киилэҕэ диэри төлөһүппүт буоллаххына 300 киилэттэн ордугар хас биирдии киилэтин аайы 50 солк. агрохолдинг төлүүр. Онтон туттарыы саҕана борооскуҥ 350-тан тахсар буоллаҕына, 300 киилэттэн саҕалаан хас киилэтин аайы 100 солк. төлөнөр,- диэн Егор Юрьевич кэпсээнин түмүктээтэ.

 

Дьэ ити курдук Дьокуускай уонна Хаҥалас эргин “Туймаада Экоферма” ХЭТ хаһаайыстыбалара үлэлии олороллор. Былаан элбэх. Ону тэҥэ уустуктар да бааллар. Биллэн турар ону туоратыыга соҕотох хаһаайыстыба ыарырҕатара өйдөнөр. Дьэ онно сүрүн тэрилтэ “Туймаада Агрохолдинг” АУо салалтата, исписэлиистэрэ сүбэлээн, көмөлөһөн, хаһаайыстыбалар бэйэ-бэйэлэригэр көмөлүсүһэн ыарахаттары туоруохтара диэн эрэл баар.

***
Прокопий ХАБАРОВ 

Оставить комментарий    

Школа-интернат для неслышащих обучающихся
Шиномонтаж Левша

Красивые окна
СахаСтройПлит
Новостройки якт ру
Сахатранснефтегаз
Стоматология 32