Ийэ тыл уонна сурук-бичик күнүнэн!

Күндү Саха Сирин олохтоохторо, эһигини барыгытын Ийэ тыл уонна сурук-бичик күнүнэн эҕэрдэлиибин!

Ийэ тыл алыптаах сүмэтэ сайыҥҥы сыралҕаннаах күҥҥэ сөрүүн сүөгэй кэриэтэ, онтон томороон тымныы сатыылаан турар кэмигэр сылаас тыллар киһини дьоллуур, ириэрэр кыахтаахтар. Дьэ, бу курдук төрөөбүт төрүт тылбыт сылаас эйгэтэ оҕо эрдэхпититтэн биһигини арыаллыыр, олохпут устатын тухары бииргэ айанныыр арыалдьыт буолар.

Тыа сирин дьоно-сэргэтэ аҥардас хаһаайыстыбаҕа эрэ буолбакка, араас тэрээһиннэри даҕаны күн бүгүн төрүт тылларынан тэрийэн ыыта тураллар. Норуот бэйэтин төрөөбүт тылынан саҥарарын тухары – тыл сүппэт, кини байар, сайдар кыахтаах.

Биһиги үөрэхпит кыһата тыа сиригэр сыстаҕас уонна тыа сирин эйгэтин сайыннарар эдэр үлэһиттэри таһаарар буолан, айар-тутар куттаах ыччаты өйүүбүт. Ол курдук, университеппыт иһинэн өр сылларга үлэлээн, биллэн-көстөн кэлбит «Сандал» уонна «Нуурал» диэн ансаамбыллардаахпытынан киэн туттабыт.

Эдэр көлүөнэ ыччаппыт кэхтибэт кэрэни кэрэһэлээтин, сахабыт норуотун сайдар тылыгар саргы-талаан буоллун, сахалыы саҥабытынан, сааһылаан этиллибит санаалары сыаналыы үөрэниэҕин, үрдуккэ дьулуһуоҕуҥ!

АГАТУ Ректорын эбээһинэһин толорооччу Константин Константинович Кривошапкин

***

Пресс-служба АГАТУ