Үөрүүлээх күҥҥэ Дьоруой дьиэ кэргэнэ үксүлэрэ кэлбиттэр: оҕолоро Анна, Вера, Георгий, Алексей, күтүөттэрэ Аркадий Данилов, Федор Иванов, кийииттэрэ Александра, Валентина, сиэннэрэ Светлана, Ксения, Мария, Татьяна, Диана, хос сиэннэрэ Карина, Ева, Дьулуур. Бары да сырдык хааннаах кыргыттар, уолаттар. Улахан кыыс Анна Георгиевна кини туһунан дириҥ ис хоһоонноох иһитиннэрии оҥордо. Ол кэннэ түмэлгэ Г.Е.Бессонов олоҕун, айар үлэтин сырдатар, кэпсиир хос арылынна. Бу күннэргэ Анна аһаҕас экскурсия тэрийиэҕэ, хата онно тиийдэххитинэ хайаан да сылдьан көрөөрүҥ-истээриҥ. Бу хоско дьиэ мала, ийэ бүтэһик тикпит этэрбэһэ, хас биирдии оҕотун туһунан кэпсиир папкалар о.д.а. тэриллэр, докумуоннар бааллар.
Аны ботаническай садка «Я служил народу…» тулаһа аһылынна. Бу иһигэр уран тарбахтаах күтүөт уол Анатолий Семенов маһынан уһаммыт урамньыта Георгий Бессонов мэтириэтэ турда. Кэлбит ыалдьыт үгүһэ Георгий Евдокимович оҕолоро бэлэх оҥорбут 25 декоративнай талах мастарын олордон бэлиэ хааллардылар. Маны кытта Бессоновтар түмэлгэ ёжик кыылы уонна сибэкки арааһын бэлэх ууннулар.
Түмэл үбүлүөйү көрсө олус киэргэммит, күөҕүнэн симэммит. 100 сылыгар Муусука хоһо аһыллыбыта, анал ааттаах ыскамыйа олохтоммута. Онтон 110 сылыгар улахан ситиһии саас-сайын аайы тэстэр сарайы оҥорууга тумус туттар киһибит Матвей Евсеев 5 мөл. солк. үбүлээн бэйэбит уолаттарбыт Маар Күөлтэн төрүттээх Владимир Емельянов биригээдэтэ түргэн үлүгэрдик оҥорон үөртүлэр. Улуус дьаһалтата тулаһа оҥоһуллуутугар үбүнэн көмө буолбут. Хас биирдии оҥоһугу, тутууну үлэһиттэр бэйэлэрэ кыайа-туталлара астык, маһы ыллатар уолаттар манна элбэхтэр: Николай Ляшеев, Анатолий Семенов, Иннокентий Саввинов, Петр Николаев, Андрей Алексеев. Кинилэргэ махтал! Салайааччы Марта Васильева аны дьиэ үрдүн уларытыыга, саҥа уот ситимин тардыыга туруорсуу үлэтэ барарын иһитиннэрдэ.
Өссө үөрүүлээҕэ түмэл бэтэрээннэрэ Анна Бессонова, Валентина Бессонова, Светлана Дегтярева Тойбохой нэһилиэгин бочуоттаах олохтооҕо үрдүк ааты ылан олуһун дьоллоннулар.
Дьоро күҥҥэ юннаттар, Дьоруойдуун алтыспыттар үксүлэрэ бааллар. Бары улуу киһини олус истиҥник ахталлар, махтал тылы аныыллар. Сүүрбэ сыл аннараа өттүгэр Дьоруой эппит хом санаата бука билигин хоммокко, төттөрүтүн бар дьону толкуйдатан баары, кэрэни кэрэхсиэххэ, биһиги да үнүгэс олордуохха!
***
Тускулаана ГОРОХОВА-КОБЕЛЬЯНОВА
Оставить комментарий