Олеся Крылова Чараҥ орто оскуолатын быйыл ситиһиилээхтик үөрэнэн бүтэрдэ. Кини оҕо эрдэҕиттэн кинигэ ааҕарын сөбүлүүр, хоһоон суруйар, үҥкүүлүүр, ыллыыр. Өссө бэйэтин хоһооннорун гитара доҕуһуолунан ырыа оҥорон көтүтэр. Билигин номнуо 20-чэ ырыалаах.
Олеся 2023 сыллаахха «Бриллиантовые нотки» бэстибээл күрэһигэр кыттан, ырыаҕа 1-кы степеннээх лауреат буолбута. Кини хоһоонноро оҕо киһи төрөөбүт дойдутугар тапталын, олоххо көрүүтүн, ыра санаатын ааҕааччыга тириэрдэр ураты тыыннаахтар. Ол да иһин өрөспүүбүлүкэтээҕи хоһоон үгүс күрэстэригэр ситиһиилээхтик кыттан, бастакы үрдэллэри ыллаҕа.
Уус Алдан Кэскилин гимна
Илиигин эн үөһээ уунууй
Дьолго эрэллээх буоллахха,
Уус Алдан кэскилигэр
Сүрэххин туттарбыт буоллахха.
Хотой тойон көтөрүн курдук
Үөһээ үрдүккэ тардыһарга!
Сырдык күн олоҥхо оҕотун
Былыттаах сиртэн таһаарарга!Сарсын сарсыарда бука бары
Эһигинниин эрэ кытары
Сүрэхпит биһиэнэ ыллыыр,
Тэҥҥэ атаарарбыт оҕо сааспытын!
Уус Алдан Кэскилэ
Куруутун бииргэ!
Биир суолунан!
Биир тыынынан!Улаатан үтүө киһи буолаҥҥыт,
Урукку олох доҕоттор ааттарын
Куруутун сүрэххитигэр тутаҥҥыт,
Ахтыы санааларга кыттыһаргыт.
Уус Алдан Кэскилэ
Махтанабыт эйиэхэ!
Маннык сүрүн бэлэххэр,
Сүтэр сүппэт мичээрдэргэ!
2024 сыллаахха лааҕырдар бэстибээллэригэр «Лагерные песни» диэн хайысхаҕа бэйэтин ырыатын ыллаан иккис үрдэл буолбута. Олеся ырыаларын оҕолор, ыччаттар сөбүлээн истэллэриттэн, ыллыылларыттан олус үөрэр. Кини хоһоонун тыллара, ырыаларын дьүрүлэ дьон дууһатыгар киирэн иэйиини үөскэтиэ диэн эрэнэр уонна кини ырыаларын күннэтэ ыллыы сылдьыахтарын баҕарар. Дьоҕурдаах кыысчаан хоһоонноро өссө даҕаны ырыа буолан көттүннэр, бар дьон сүрэҕин сүүйэ турдуннар, үрдүккэ кынаттаатыннар!
Сахам сирин кыһына
Күн ахсын көрсөр күнүм сырдыга,
Тымныы сахам сирэ салгына.
Олунньу ый айылҕа кыһына
Дууһабын сэрэнэн таарыйара.Мин төрөөбүт дойдум миэхэ ийэ,
Өбүгэм хаалларбыт сирдэрэ.
Маҥан хаар сылытарын кэриэтэ,
Остуоруйа санаатын биэрэрэ…Мин бөөлүүн түүн көрбүт түүлбэр курдук
Табалар сүүрэллэр тыа устун.
Бу мин сахам сирин оҥоһугун
Уруһуйга ойуулуур уустугун!Сахам сирэ кыһына тымныыта
Иэдэспин кычыкылатара.
Атын омук сиригэр ханнык да
Билиммэппин сахам сирин оннугар!
Светлана Бурцева, уопс.кэрэсп.
Оставить комментарий