Дьикти дьарыктаах Айыы Аламай

“Мин төрүөхпүттэн Алена Абрамова диэн ааттаах этим. Икки сыл толкуйдаан, төрүттэрбин үөрэтэн баран, бэйэбин уларытаары, сырдыкка талаһаары Айыы Аламай Алаас кыыһа диэн ааты ылынным, докумуоммун уларыттардым.

Алаас кыыһа диэн удьуордарбыттан кэллэ, алааһы кытта улахан ситимнээх киһибин. Биһиги айыы дьонноробут, Айыылаах, Аламай диэн тыллар элбэх суолталаахтар. Уруккуттан хоһооннорбор айыы, алаас кыыһа диэн тыллары элбэхтэ туттар эбиппин, ийэбэр анаабыт ырыабар күн уобараһа киирбитэ, аламай диэн тыл күнү кытта сибээстээх, күн кыырпаҕа буолан сыдьаайа сылдьыахпын баҕарабын. Саҥа ааттанан баран дууһам уоскуйбут курдук буолла. Сахалыы ааттаах буоллахха ийэ кут нөҥүө өбүгэ долоҕойо уһуктар диэн этэллэр.

Кэргэним Валерий Стручков ааппын уларытарбын өйөөбүтэ, Ньурба тыйаатырыгар ааспыт сыл сэтинньитигэр үлэлии кэлбиппит, бастакы кылааска үөрэнэр уоллаахпыт.

Биһиги дьиэ кэргэн сөбүлээн дьарыктанар дьарыкпыт хаарынан, мууһунан араас фигуралары оҥоруу. Бу сыл саҕаланыыта Красноярскай куоракка биэс кэнники сылга аан бастакытын норуоттар икки ардыларынааҕы «Волшебный лед Сибири» күрэх буолбута. Бу күрэххэ эрдэттэн эскизтэрбитин ыытан ыҥырыы туппуппут. Москваттан, Санкт-Петербуртан, Екатеринбуртан, Пермтэн, Сочиттан, Иркутскай уобаластан, Кытайтан, Белоруссияттан, Монголияттан уонна Сахабыт сириттэн кыттааччылар бааллар этэ.

Күрэх композитор Петр Ильич Чайковскайга анаммыта. Биһиги хамаандабытыгар Үөһээ Бүлүүттэн төрүттээх ювелир Васильев Василий Валентинович диэн Валерий доҕоро баар этэ, хамаандабыт аата «Көмүс кынаттар» диэн. Сүбэлэһэн баран оҥоһукпутун Чайковскай «Пиковая дама» диэн мистическэй, таайтарыылаах айымньытынан толкуйдаан хаарынан оҥорбуппут. Красноярскайдар күрэҕи үрдүк таһымнаахтык тэрийбиттэрэ. Хас биирдии кыттааччыгар бэлэх туттарбыттара.

Кэргэним Валерий Валерьевич мындыр толкуйдаах, талааннаах киһи, олус убаастыыбын. Красноярскайга буолбут күрэххэ миэстэлэспэтибит, ол эрээри, улахан уопут ыллыбыт, араас маастардары кытта билистибит, бэйэбитин да көрдөрдүбүт, сыыһаларбытын билинэн аныгыскы кыттыыбытыгар учуоттуохпут дии саныыбын. Ньурба тыйаатырын салайааччыларыгар, кэлэктиипкэ өйүүллэрин, өйдүүллэрин иһин махтанабыт”.

Ньурбатааҕы драмтеатр пресс-сулууспата